«Земский духтир/фельдшер» программайин бинайиинди республикайин больницйириъ лихру йишвар а,– мумкинвал имиди документар уч апIинай.
Ктабхъурайи 2022-пи йисан эвелариан гъийин йигъаз ихь республикайин дагълу йишвариъ «Земский духтир/фельдшер» программайин бинайиинди 161 медицинайин гъуллугъчи ляхнариъ дийигъну.
Му программа духтрар гьуркIри адру дагълу районариъ, гъулариъ ва бицIи шагьрариъ (Кьибла Сухокумск, Гъизилюрт ва Дагъустандин Огни) медицинайин кадрийирин месэла гьял апIуз диш дапIнайиб ву.
«Земский духтир» программайиинди ляхниъ дийигъу духтрариз чпин маважибдилан гъайри, гьюкуматдин терефнаан саб ражари вуди 1 миллион манат, хъа лап дагълу ва рякъяр адру йишвариз лихуз гъушдариз – 1,5 миллион, хъа фельдшерариз 500 – 750 агъзур манат тувра. Мидланра гъайри, муниципалитетарин кIулиъ айидариз райондиз гъафи цIийи пишекрариз социальный цирклиан вари терефариан кюмек тувувал табшурмиш дапIна.
Программайин бинайиинди лихру азад йишвар гьелелиг ими. Дагъустандин сагъламвал уьбхбан министрествойин сайтдиъ думу йишварин уьмуми сиягь тувна.
Эгер Табасаран райондикан улхуруш, РД-йин минздравдин сайтдиъ 2022-пи йисан 7-пи ноябриъ тувнайи цIийи сиягьнаъ улупнайиганси, райондиз 18 духтир чарасуз вуди лазим ву. Табасаран райондин кьялан больницайиз анестизиолог-реаниматолог духтир, инфекционист-духтир, функциональный диагностика гъабхру духтир, психиатр-нарколог-духтир, бицIидарин эндокринолог-духтир ва медицинайин тяди кюмек тувру духтир лазим ву. Мидланра гъайри, ТIивак, Марагъа, Къужник, ТинитI, ТIюрягъ гъулариз участокдин терапевтар, ТинитI ва Хюрикк гъулариз педиатрар, СиртIич гъулан участковый больницайиз хирург, акушер-гинеколог, травмотолог-ортопед духтрар лазим ву.
Хив райондин кьялан больница «Земский духтир» программайин бинайиинди 9 духтир ляхниз кьабул апIуз гьязурди а. Дурар педиатр, кьюр анестезиолог-реаниматологар, эндоскопист, рентгенолог, психиатр, невролог, онколог, оториноларинголог пишекар духтрар вуди ккунду.
«Земский духтир/фельдшер» программа Дагъустан Республикайиъ 2012-пи йисхъан мина уьмриз кечирмиш апIура. Му вахтнан арайиъ дидин кюмекниинди 1500-тIан артухъ духтрариз ляхнин йишвар гъидихъну.
