1993-пи йислан мина 12-пи декабрь ихь уьлкейин Конституцияйин йигъси къайд апIура. Къанун-къайдайи вари инсанарин уьмриъ уйнамиш апIурайи ролиз лигну, РФ-дин Конституцияйин йигъаз бахш дапIнайи программайин дахилнаъди ва Хив райондин администрацияйин къарарниинди райондиъ саб жерге серенжемар ва мяракйир кIули гъушну.
Райондин администрацияйиъ гьаму йигъан чпин яш 14 йис гъабхьи живанариз райондин глава Ярмет Ярметовди чан хиларилан паспортар тувнийи. Му йигъан Хив гъулан спортдин мектебдиъ 36 кг ва 70 кг гъагъ айи жигьиларин арайиъ юкьяр дисбан спортдиан талитар, ва гьацира шахматарин турнир кIули гъухнийи. 5-пи декабрилан 12-пи декабриина гъяйизкьан райондин мектебариъ ва бицIидарин багъариъ уьлкейин Конституцияйиз бахш дапIнайи цалин газатарин, ватанпервервалин мяълийир апIбан ва шиърар урхбан, урхурайидари гъизигу шикларин выставкйир тешкил гъапIнийи. Гьелбетда, дицдар серенжемарин вари иштиракчйир тялукь пешкешариинди, пулиинди ва чухсагъул мялум апIбан кагъзариинди лишанлу гъапIнийи.
Му йигъан республикайиан Хив райондиз саб жерге хяларра гъафнийи – Имам Шамилин ччвурнахъ хъайи вари халкьарин фонднан президент Аьлиасхаб Хархачаев ва Госдумайин депутатдин кюмекчи, генерал-полковник Мягьямед Танкаевдин ччвурнахъ хъайи жигьилариз ватанпервервалин тербия тувбан фонднан председатель Гьясангьюсейн Аьбдулжелилов айи.
Дурар Хив райондиз гъюбан асас себеб – ихь ватанагьли, Урусатдин Игит, Луганск Халкьдин Республикайин Игит, генерал-майор Эседуллагь Абачевдин дада Угълан Абачева, жигьил насил тербияламиш апIбаз, гизаф миллетарин юрд вуйи Дагъустандин хизандин ва рюгьнан кьиматлувал уьрхбаъ улупу башкъа хъуркьувалариз лигну, «Дагъустандин игит дада» кIуру гъизилин ордендиинди лишанлу апIувал вуйи.
Манишнан ялав гьисс хьуз гъит-райи суфрайихъ деънайи Угълан бабу, чахьна айи хатур-гьюрматназ сифте чан терефнаан, хъасин вари уч духьнайи майил-мадатарин терефнаан райондин администрацияйиз, чIатан дуфнайи хялариз ва Зилдикк гъулан агьалйириз гьаруриз жа-жаради чухсагъул мялум дапIну, дюн’яйиъ ислягьвал хьуб ккун гъапIнийи.
