Журналиствалин пише варитIан гизаф хатIалу ляхнарикан саб вуди гъубзра. Пишекарвалин буржи тамам апIурайи вахтна гъийиху Урусатдин журналистарин пашман сиягьнаъ 341-тIан артухъ ччвурар а. ВаритIан гизаф гъийиху журналистар Дагъустандиан ву. Дурар – Мягьямедсалигь Гусаев, Загьир Арухов, Гьарун Къурбанов, Гьяжи Абашилов, Гьяжимурад Камалов ва… . Вари 17 кас. Дурари, гафнан азадвал, агьалйириз гьякьлу аьгьвалат улупбан бадали, чпин жанар фида гъапIну.

 

 

Урусатдин журналистарин союздин тешкиллувалиинди, 1991-пи йисан пишекарвалин буржи тамам апIурайи вахтна гъийиху журналистар кIваин апIру йигъ тяйин гъапIнийи.

Мягьямедсалигь Гусаев Дагъус-тандиъ экстремиствализ аькси женгнан кIулиъ дийигънийи. Дугъ’ина террористари швнуб-саб ражари гьюжум гъапIнийи. 2003-пи йисан 27-пи августдиъ террористарихьан чпин кьаст кIулиз адабгъуз гъабхьнийи.

Дугъан ляхин Загьир Аруховди давам гъапIнийи. Думу, чав ляхин апIуз хъюгъю садпи йигъланмина, вари халкьарин террориствалихъди мялуматарин женгнан кIулиъ дийигънийи. 2005-пи йисан 20-пи майиъ террористари дугъ’ина гьюжум гъапIну. З.Арухов хулаз гъягъюз машиндиан удучIву йи-швахь террористари тIубкIру сяняаьт гьяракатназ гъабхнийи. Учв милли политикайин, мялуматарин ва чIатан аьлакьйирин министрди гъилиху жикъи вахтнан арайиъ Загьир Арухов чан асас проект – РГВК «Дагъустан» тешкил апIуз хъуркьнийи.

Урусатдин журналистарин союздин вакиларин гафариинди, гьар йисан жюрбежюр дюшюшариъ 10-рилан 20 касдиина журналистар уьмриан гъягъюра. Бязи журналистар йивну йихувалин дюшюшар гъира ашкар дапIнадар. Гафнан азадвал гъюбхю касариина хил за гъапIу хаинкрар наан-вуш сагъ-саламатди яшамиш шула.