Майин 16-пи йигъан «Урусат – йиз тарих» парк-музейиъ «Табасарандин нурар» газатдин редакцияйин жягьтлувалиинди тешкил гъапIу табасаран чIалниинди вари халкьдин диктант кIули гъубшну.
Серенжем ккебгъайиз улихьна Табасаран ва Хив районарин культурайин хуларин дахилнаъ айи Урусатдин халкьарин аьдати культурайин центрарин коллективари ихь халкьдин кюгьне сяняаьткарваларин выставка тешкил гъапIнийи. Жара мурччваъ табасаран халачйирин, табасаран художникар Аьбдурягьман Уьсмановди ва Шагьнабат Аьлимягьямадовайи гъизигу шикларин, ихь шаирари, писателари, чIалниин лихурайи аьлимари тазади чапдиан адагъу китабарин выставкйир гьязур дапIнайи. Диктант бикIуз хъюгъяйиз улихьна концертдин залиъ бицIи программа улупнийи. РД-йин культурайин лайикьлу артист Аьбдуллагь Мирзакеримовди юкIв гъабхрусдар кьюб мяъли гъапIнийи, хъа Гьюкуматдин табасаран драмайин театрин артистари сягьнайиина «Яшамиш хьидихьа» кIуру спекталиан саб перде адабгънийи. Дурарин устадвали залиъ уч духьнайидарик ватанпервервалин гьевес капIнийи.
Диктант бикIуз дуфнайидарин арайиъ РД-йин сагъламвал уьбхбан министр Жамалудин Гьяжиибрагьимов, РД-йин Халкьдин Собраниейин депутатар Алавудин Мирзабалаев ва Нариман Асваров, Табасаран райондин глава Мягьямед Къурбанов, Хив райондин глава Ярмет Ярметов, машгьур аьлимар – Зейдуллагь Юзбегов, Мягьямед Гьясанов, Низами Аскеров, Назир Аьшурбегов, табасаран шаирар, писателар, жямяаьтлугъ касар, студентар ва табасаран халкьдин шубудварждтIан артухъ вакилар айи. Серенжем ачмиш гъапIу республикайин «Табасарандин нурар» газатдин кIулин редактор Гюлягьмад Маллялиевди уч духьнайидар багъри чIалнан гъийин машкврихъди тебрик гъапIнийи.
«Тешкилатчйирин улихь варитIан учIруди зализ диктант бикIуз инсанар уч апIувалин месэла дийибгънайи… Амма гьякьикьат жараб гъабхьну. Гъи мина дуфнайи касарин кьадарну бабан чIалнахьна, багъри культурайихьна ихь халкьдин вакиларин янашмиш’вал лап ужуб вуйиваликан шагьидвал апIура.
Багъри культурайихъан мукьан юкIв убгурайивализ учвуз варидариз чухсагъул!»,
– гъапнийи газатдин кIулин редактори.
Cягьнайилан РД-йин сагъламвал уьбхбан министр Жамалудин Гьяжиибрагьимовди, Табасаран ва Хив районарин главйир Мягьямед Къурбановди ва Ярмет Ярметовди чIалну миллетдин уьмриъ дибиснайи йишвкан, чпи диктант бикIуз аьхю аьшкьниинди дуфнайиваликан гъапнийи. РД-йин Халкьдин Собраниейин депутат Алавудин Мирзабалаевди чан улхуб мектебариъ бабан чIалниин лихурайи мялимариз чухсагъул мялим апIбалан ккебгънийи. «Табасаран чIал киврайи мялимари, чпи фукьан аьзиятнаъ ашра, чпиз фукьан читинвалар алахьурашра, гъюрайи бицIи маважибдиз дилигди, гьаму ихь багъри чIал уьбхбак аьхю пай кивра. Улихьна йисариси дарди, бабан чIалниинди вуйи литература, методикайин пособйир, учебникар, гьацира бабан чIалниинди улхрудар гъи цIиб духьна.
Ухьу варидари табасаран чIал уьбхбак чпин пай киврайидариз кюмек дапIну ккунду.
Гъисиб йигъан гьамкьан халкь саб йишв’ина уч апIувал бицIи ляхин дар. Табасаран чIалназ фикир тувувал – ихь бабариз, ихь Ватандиз фикир тувувалик гьисаб ву», – натижа гъивнийи депутатди.
Табасаран чIалнан грамматикайин бязи читин месэлйирикан РАН-дин ДНЦ-йин чIалнан, литературайин ва искусствойин Институтдин гъуллугъчи, филологияйин илмарин кандидат Шарафудин Дашдемировди ктибтнийи. Дугъу гьацира уч духьнайидарин фикир диктант бикIруган алахьуз мумкин вуйи дюшюшариина жалб гъапIнийи.
Вари халкьдин улихь диктант урхуз сягьнайиина Хив райондин Хив гъулан Манаф Шамхаловдин ччвурнахъ хъайи мектебдин мялим Тамила Аьлипашаева удучIвнийи. Дугъу мектебдиъ баяр-шубариз фициб къайдайиинди диктант урхуруш, гьадму жюрейиинди залиъ айидариз Аь.Жяфаровдин «Хлинццар кайи зиянкар» китабдиан кьатI гъурхнийи.
Диктантдин кьяляхъ 40-рихьна табасаран чIал кивру мялимари диктант кайи кагъзар ахтармиш гъапIнийи.
Диктандин гьякьнаан аьлава мялуматар газатдин гъюру нумрайиъ яркьуди тувдича.
«Табасарандин нурар»
газатдин коллектив
