18-пи декабриъ Табасаран райондин Кьалухъ Мирзайин ччвурнахъ хъайи спорткомплексдиъ гизаф йисари Табасаран райондин ТОКС-дин командирди гъилиху Аьлимягьямед Уьсмановдин рюгьяриз бахш дапIнайи волейболин турнир кIули гъубшну.
Аьлимягьямед Гьяжиуьмарович Уьсманов 1961-пи йисан Табасаран райондин Хьарагъ гъулаъ нежбрин хизандиъ бабкан гъахьну. 1968-пи йисан дугъу Шил’арин кьялан мектебдиъ урхуз хъюгъну. Мектеб ккудубкIган, 1980-82-пи йисари дугъу СССР-ин Яракьлу Кьувватариъ чан ватандаш’валин буржи тамам апIуру. Армияйиан гъафир ДГПИ-йин тарихнан факультетдик урхуз кучIвру ва 1987-пи йисан думу уьру дипломдиинди ккудубкIуру. Гьаддихъанмина Аьлимягьямед Уьсманов, багъри Шил’арин мектебдиъ тарихнан дарсар киври, 33 йисан гъилихну.
Табасаран райондиъ ТОКС-ди ляхин апIуз хъюгъхъанмина Аьлимягьямед Уьсманов дидин кIакIнаъ ади гъахьну. Жямяаьтлугъ ляхнариъра жанлуди иштирак шули, дугъу гъулан жямяаьтлугъдиъ коллективдин дустарин арайиъ ужуб гьюрмат гъазанмиш гъапIнийи. Думу волейболиинра гизаф юкIв алир вуйи.
Волейболин турнир Табасаран райондин администрацияйин ва гьацира ГьепIил гъул’ан вуйи меценат Неби Небиевдин кюмекниинди тешкил гъапIнийи. Турнир 21-пи октябриан 18-пи декабризкьан давам гъабхьнийи. Талитариъ райондин гъуларин советариан 11 командайи иштирак’вал гъапIнийи, ва дурар вари чиб-чпихъди гюрюшмиш гъахьнийи. Талитарин натижайиъ варитIан гизаф очкйир гъадагъу юкьуб команда турнирин финалин пайназ удучIвну: «Чвйир» кIуру команда, райондин администрацияйин команда, Улуз ва Гуми гъуларин командйир. Финалиъ жюрбежюр командйириан спортсменарикан ибарат дубхьнайи «Чвйир» командана райондин администрацияйин команда чиб-чпихъди талитназ удучIвну, натижайиъ администрацияйин волейболин команда гъалиб гъабхьну. Шубубпи йишв бадали талитнаъ Улзарин команда Гуми гъулан командайин зиин гъалиб гъабхьну.
Волейболин турнирин аьхиримжи йигъан душваъ райондин спортдин отделин начальник Низами Агъаризаев, 3-пи нумрайин ДЮСШ-дин директор Садикь Уьсманов, спортдиин машгъул касар, Аьлимягьямеддин дустар ва мектебдиъ урхурайидар иштирак гъахьну. Гъалиб гъахьи командйир пулин дакьатариинди, кубкйириинди, грамотйириинди ва медалариинди лишанлу гъапIнийи. Гьацира 4-пи йишв гъадабгъу Гум’арин командара пешкешар тувбиинди лишанлу гъапIнийи.
Аьлимягьямед Уьсмановдин рюгьяриз бахш дапIнайи волейболин турнир Табасаран райондиъ гьамусдихъантина гьар йисан кIули гъябгъиди.
