Республикайин гъулан йишвариъ ва бицIи шагьрариъ медицинайин гъуллугъчйирин кьадар артухъ апIуз диш дапIнайи «Земский духтир» программа уьмриз кечирмиш апIувал давам шула.
РД-йин сагъламвал уьбхбан министерствойин пресс-гъуллугъну «Табасарандин нурар» газатдиз туву мялуматариинди, гьаму йисан эвелианмина медицинайин 161 гъуллугъчийи гъулариъ ляхин апIуз хъюгъна. Дурариз, чпин маважибдилан гъайри, 1 миллион манат, гъягъюз-гъюз читин йишвариъ айидариз – 1,5 миллион манат, фельдшерариз – 500 ва 750 агъзур манат тувра.
Гьаддихъди сабси, министерствойин пресс-гъуллугънаан къайд гъапIганси, гьелелиг азад йишвар гъузна. Гьамусяаьт республикайин районарин, гьадму гьисабнаан Табасаран ва Хив районаринра, кьялан больницйириз 313 духтрарин ва кьялан пишекарвалин 28 гъуллугъчийин игьтияж ими. Дурарин гьякьнаан тамам вуйи сиягьнахъди РД-йин сагъламвал уьбхбан министерствойин сайтдиъ таниш хьуз шулу.
