Ктабхъурайи йисандин натижир йивури, Хив райондин культурайин, спортдин, жигьиларин политикайин ва туризмдин гъуллугъчйирин совещание кIули гъубшну.
Совещание абццур ва кIули гъубхур Хив райондин КСМПваТ-дин отделин начальник Казбек Къазиев вуйи. Серенжемдиъ райондин вари гъуларин культурайин хуларин директорари, художествойин самодеятельностдин руководителари ва библиотекйирин заведующйири иштирак’вал гъапIнийи.
Казбек Къазиев чан гьякь-гьисабнан докладдиъ Хив райондин администрацияйин ва республикайин культурайин министерствойин кюмекниинди ктабхъурайи йисан райондиъ 10 культурайин ужагъар цIийи алауваликан, 21-пи аьсрин вари тIалабариз жаваб тувру музыкайин пультарихъди, колонкйирихъди, микрофонарихъди, компьютерарихъди, дусру креслойирихъди, тяхилар ккади улихь дивру устларихъди, диванарихъди, шкафарихъди ва хайлин жара алатарихъди ккабалгнийи ужагъар къайдайиз гъахиваликан ва думу культурайин хулариъ гъарашугъари гъабхурайи заан дережайин ляхникан разиди гъулхнийи.
Чан улхуб давам апIури, дугъу, муганайизси дарди, гъи райондин спортдин цирклиъра ляхин кьюбдри улихь гъябгъюрайиваликан, библиотекйир таза китабарихъди ва журналарихъди тямин дапIнайиваликан, юрднан успагьи ва такабур йишвариин аьшкьлу духьнайи туристарин кьадар артухъ дубхьнайиваликан ва гьацира райондиъ фициб жюрейин серенжем гъабхурашра, дидик хушлуди ва аьшкьлуди чпин хусуси пай кивнайи волонтерарикан ктибтнийи.
Саб гафниинди, Казбек Къазиевди культурайин цирклиъ лихурайи чан коллективдиз, вари гъуллугъчйириз жа-жаради аферин мялум дапIну, дурарикан улубкьурайи йисанра гьаму жюрейин баркаллу зегьмет зигувал давам апIуб ккун гъапIнийи.
Совещаниейин аьхириъ чпин ляхниъ ужудар натижйир ва хъуркьувалар улупурайи Асккан Яракк гъулан культурайин хулан директор Нюдюряли Аьлияров, ЦIийи Фрюгъ гъулан культурайин художествойин самодеятельностдин руководитель Рамиз Уьсманов, ЦIудухъ гъулан культурайин художествойин самодеятельностдин кIулиъ айи Сяида Аьшурбегова, райондин ЦБС-дин методист Наташа Гьяжимурадова ва ЧIири гъулан библиотекайин филиалин кIулиъ айи Муса Жамалов чухсагъул мялум апIбан кагъзариинди ва ЦIийи йисаз тялукь пешкешариинди лишанлу гъапIнийи.
