Гьаму йисан январин вазлилан башламиш дапIну, Урусатдин Пенсйирин фондну бицIидар хъайи хизанариз кюмек вуди (улихьди думу кюмек агьалйирин яшайишдин тереф уьбхру органари туврайи) 65 миллиардтIан артухъ пул тувна.
Яшайишдин тяминвализ дилигну, туврайи пул 1,3 миллион абйир-бабари гъадабгъну. Читинвал кайи агьалйириз кюмек тувбан гьякьнаан ПФР-ин ихтиярназ тувнайи уьлчмйир, жюрбежюр себебариз лигну, кьабул апIура. Мисал вуди гъадабгъиш, гъагъдиъ айи дишагьлийириз, сад йисна гьацI дубхьну адру бицIир хъайидариз, армияйиз душнайи баярин бицIидариз ва гьацдар жарадариз. Сад йисна гьацI дубхьну адру бицIир хъайи ва ляхин апIури адру дадйириз, варисвал апIурайидариз, думу бицIидариз хъайивал апIбан бадали, Пенсйирин фондну 59 миллиардтIан артухъ пул тувна. Призывдиинди армияйиз душнайи жигьиларин хпариз ва бицIидариз саб ражари ва гьар вазлиъ тувру пособйирин кьадар 527 миллион манатдиина удубчIвна. БицIир бабкан гъахьи дадйириз ясана бицIир чпин веледвализ гъадагъдариз саб ражари тувру пул 5,5 миллиард манатдин кьадарнаъди тувна. ПФР-ин идарайиан гъаврикк ккаъра, эгер гьаму жюрейин уьлчмйир кьабул апIуз ихтияр арайиз дуфнаш, ПФР-ин клиентарин гъуллугъназ ясана МФЦ-йиз илтIикIай.
Кюмек рубкьру гизаф дишагьлийир жюрбежюр себебариан пулин кюмек дарди гъузра. Хъа чпиз рубкьури адаршра, руш’ват туври, лутивалиинди думу кюмек дюз апIрударра гизаф а. Гьелбетда, дицисдар касар агувал ихь вазифа дар, ихь вазифа мициб кюмек рубкьрудариз документар гьязур апIуз кюмек апIувал ву.
Апрелин вазлиъ, гьюкуматдин терефнаан пулин кюмек туврувалин гьякьнаан мялуматар удучIвиган, йиз гъунши дишагьли, чан 10 ва 13 йисаъ айи бицIидариз кюмек ккун апIури, ПФР-ин отделениейиз илтIикIну. Дугъаз пул рубкьури адар кIуру жюрейин жаваб гъафну. Дишагьлийин жилир ляхниан удучIвну 3-4 ваз вуйи. Хъа дишагьлийи чан гьар вазлин маважиб ипотекайиз гъадагънайи хуларихъан тувра. Хизандиз затра пул гъубзрадайи. Амма гьаз вуш кюмекнан дакьатар ккун апIбан дугъан аьрза дюз шуладайи. Дишагьли депутатдихьна илтIикIну. Депутатди, ПФР-ин вакилиз телефондиан зенг дапIну, дишагьлийин хизандин гъазанж дюзди гьисаб апIувал ккун гъапIну. Гьамцдар дюшюшарра шулу. Эгер къанундиинди учвуз пулин кюмек рубкьураш, аьхиризкьан думу тIалаб апIинай. Лутйириз руш’ватар мутуванай.
Мидланра савайи, Пенсйирин фондну ва Минцифрайи «Госуслуги» порталиъ электрондин цIийи сервисар ляхник кирчна. Кюмек ккун апIури илтIикIбан бадали, гизафси электрондин саб аьрза тувувалтIан лазим шуладар. Пулин кюмек ккун апIбан гьякьнаан тамам мялуматар гъадагъбан бадали, РД-йиъ айи ГУ ОПФР-ин «горячая линияйин» телефондин 88006000317 нумрайиз зенг апIуз шулу.
