21-пи декабриъ Урусатдин Президент Владимир Путинди РФ-дин оборонайин министерствойин коллегияйин яркьу заседание кIули гъубхну. Гюрюшдин иштиракчйири Урусатдин Яракьлу кьуватарин 2022-пи йисандин ляхнин натижйир гъивну ва 2023-пи йисаз вуйи месэлйир планламиш гъапIну.
Чан удучIвну улхбан эвелиъ гьюкуматдин кIулиъ айири хусуси метлеб айи дявдин операцияйиъ иштирак шулайи эскрариз ва офицерариз чухсагъул мялум гъапIну, гъийихдарин гьюрмат уьбхюри, саб дакьикьайиъ ккебехъну гъузну, оборонайин министерствойин улихь дивнайи месэлйир хъуркьувалиинди тамам апIбак умуд кивну.
Владимир Путинди къайд гъапIганси, Урусатди гъабхурайи хусуси метлеб айи дявдин операция давам шула, Урусатдиз къаршуди НАТО-йин саки вари членарин дявдин кьувват ишлетмиш апIура. Украинайиъ Урусатдиз къаршуди сатIи духьнайи Ригъ алабхъру терефнан уьлкйири гьаму дявдиз 97 миллиард долларар харж гъапIну. ВСУ-йин тереф уьбхюри, 500-тIан артухъ спутникар айи дестейи ляхин апIура. Украинайи дяви гъабхбаъ террориствалин хатI ишлетмиш апIура, дявдин тахсиркарвалар апIувал яваш апIурадар. «Гьаци вушра ихь эскрар ва офицерар Урусат бадали мюгькамди дийигъна. Хусуси метлеб айи дявдин операцияйиъ ухьуз аьксиди ишлетмиш апIурайи НАТО-йин кьувватарикан, дакьатарикан ужуди мялум вухьуз. Думу улупбар, вари ахтармиш дапIну, ихь кьушмарин, хусуси метлеб айи гъуллугъарин дявдин мумкинвалар за апIбан бадали, ишлетмиш дапIну ккунду», – гъапну РФ-дин Президентди.
Бегьем дару мобилизацияйиинди яракьлу кьуватарин дахилназ душнайи 300 000 касдикан 150 000 фронтдиъ а. В.Путиндин фикриинди, думу кьадар СВО-йин гьаму пайназ бегьем ву. 20 000 кас чпин хушниинди гъафидар ву. Призывдиккан 830 000 кас азад гъапIнийи.
Гьюкуматдин кIулиъ айири бегьем дару мобилизация гъабхру вахтна ашкар гъахьи гъалатIарикан гъапнийи ва ухди гьял дапIну ккуни месэлйир улупнийи. «Военный комиссариатарин гъурулушдин ляхнин цифровизация гъабхури, ерли ва регионарин гьюкмарихъди аьлакьйир мюгькам апIури, ватандаш ва аьтрафарин оборонайин гъурулуш цIийи алапIну ккунду. Яракьар, дявдин техника уьбхбан, мобилизацияйин частар ерлешмиш апIбан бадали, материалин дакьатар артухъ апIру гъурулушдин ляхин заан ерийиз хувал лазим ву. Финансарихъди читинвал адар. Армияйи ккун апIурайиб уьлкейи, правительствойи вари тувра», – къайд гъапIнийи дугъу.
Владимир Путинди къайд гъапIганси, СВО-йиъ иштирак гъахьи 100 000-тIан артухъ касариз гьюкуматдин наградйир тувна. Гъийихдарра кади, 120 кас Урусатдин Игитар гъахьну. Дявдин гъуллугънаъ айи 250 000 касди дяви гъабхбан тажруба гъадабгъну.
«Улубкьурайи йисан январин вазлиъ дюн’яйиъ чаз барабар яракь адру, гьюлериин ерлешмиш апIру, гиперзвуковой «Циркон» ракетйир деетру «Советарин Союздин флотдин адмирал Горшков» гими дявдин гъуллугъназ удубчIвура.
Хусуси метлеб айи дявдин операцияйин тажрубайи улупганси, квадрокоптерар ишлетмиш апIувал чарасуз лазим ву, дурар дявдин вари отделенйириъ бегьемди ади ккунду. Мидланра савайи, дурарин ляхин чиб-чпихъди сатIи апIуб лазим ву. Ухьуз инсан адарди штун кIанаккди гъягъру аппаратар гьясил апIбан тажруба ахьуз. Промышленностдизра вари мумкинвалар а», – гъапнийи чан улхбаъ уьлкейин Президентди.
Владимир Путинди мялум гъапIганси, стратегияйин ядерный кьувватарин яракьдин деврин чешнейин дережа 91 процентдилан зиина удубчIвну. РВСН-дин полкар деврин тIалабариз гъилигу гиперзвуковой «Авангард» ракетйирихъди тямин апIувал давам шула. Лап багарихьди континентарин арайиъ ишлетмиш апIуз шлу, «Сармат» ччвур тувнайи баллистический ракетйир сабпи ражари дявдин дежурствойиъ дийи-гъиди. «Ядерный триадайин дявдин гьязурлугвал ва къайдайиз хувал давам апIидихьа. Думу ихь суверенитет ва аьтрафарин пай апIуз даршлувалин асас гирав ву», – гъапну дугъу.
Гьацира РФ-дин Президентди оборонайин министерствойикан ватандашарин теклифариз дикъат тувуб ккун гъапIну: тянкьид апIурайи терефариз фикир туври, вахтниинди дурар дюз алаувал.
Владимир Путинди уьлкейин яракьлу кьуватариз кюмек апIурайи вари агьалйириз чухсагъул мялум гъапIну. Думу шулайи аьхю зарарнан гъавриъ а, хъа жара чара имдайи.
«Урусатдин кьушмари Украинайин инфраструктура дагъитмиш апIувал давам апIура. Багарихьди Украинайиз жара уьлкйири туврубтIан гьич фукIара гъубзидар», – натижа гъивнийи Президентди.
РФ-дин оборонайин министр Сергей Шойгуйи чан докладдиъ, улихь дивнайи месэлйир тамам дапIну ккудубкIайизкьан, хусуси метлеб айи дявдин операция давам шлуваликан гъапну. Дугъу чан улхбаъ гьамцдар теклифар улихьна адагъну: армияйиз дих апIру вахт 18 йислан хъюгъну 21 йис’ина за апIувал ва 30 йис хьайизкьан армияйиз дих апIру вахт ярхи апIувал; РФ-дин Яракьлу Кьувватарин кьадар, 695 агъзур кас контрактдиинди гъуллугъ апIурайидарра кади, 1,5 миллион касдиина за апIувал; ихь сяргьятарихъ НАТО-йи чан дявдин кьувват за апIбанди вуйивал гьисабназ гъадабгъну, Урусатдин кафари ригъ алабхъру терефнаъ кьушмарин десте арайиз хувал.
Владимир Путиндин ва Сергей Шойгуйин РФ-дин оборонайин министерствойин коллегияйиъ удучIвну улхбариан мялум шулайиси, Украинайиъ Ригъ алабхъру терефнан уьлкйирихъди вуйи дяви ярхиб хьибди. Армияйиз артухъ инсанарин, материаларин, пулин дакьатар жара апIиди. Яракьлу кьувватар гьарсабдихъди тямин апIбаъ деетнайи гъалатIар гардандиъ дидисну, армияйиъ бегьем реформйир планламиш апIруси ву.
