25 – 26-пи декабриъ Мягьячгъала шагьриъ Елена Исинбаевайин ччвурнахъ хъайи стадиондиин волейболиан Дагъустан Республикайин турнир кIули гъубшну.
Турнириъ волейболин 7 командайи иштирак`вал гъапIну: Табасаран, Хасавюрт, Новолак, Леваши районарин, ДГУ-йин, ДГМУ-йин ва ДГТУ-йин командйири. Турнирин сабпи йигъан командйири группйириан удучIвбан талитар кIули гъухну, хъасин 4 командайи финалиъ волейбол уйнамиш гъапIну.
Финалин талитариъ сабпидарди Хасавюрт ва Табасаран районарин командйир чиб-чпихъди гюрюшмиш гъахьну. Натижайиъ Хасавюрт райондин волейболин команда гъалиб, хъа Леваши райондин команда ДГУ-йин командайихьан магълуб гъахьну.
Сабпи йишв бадали Хасавюрт райондинна ДГУ-йин командйири волейбол уйнамиш гъапIну. Му талитнаъ гъалиб дубхьну, Хасавюрт райондин командайи ургубпи ражари Дагъустан Республикайин чемпионвал гъазанмиш гъапIну. Кьюбпи йишв ДГУ-йин волейболин командайиз гъабхьну. Хъа шубубпи йишв бадали вуйи талитнаъ Табасаран райондин командайи Леваши райондин командайиин гъалибвал гъадабгъну.
Турнириъ пешкешнан йишвар гъадагъу волейболин командйир кубокарихъди, медаларихъди, грамотйирихъди ва багьалу пешкешарихъди лишанлу гъапIну.
Табасаран райондин волейболин командайин капитан Садикь Уьсмановдин гафариинди, му турнир лап маракьлуди кIули гъубшнийи.
«Учу республикайиъ шубубпи йишв гъадабгъбиин гизаф рази вуча, думура цIийи командайиз аьхю хъуркьувал ву. Му турнириъ учу волейболиан варитIан гужли командйирихъди гюрюшмиш гъахьнийча. Гьадрарикан саб Хасавюрт райондин команда вуйи. Думу команда цци хъади – хъади ургубпи ражну Дагъустандин чемпион гъабхьну. Гьаддиз пашман хьуз ляхин адар, гъюру йисари ихь командара дурарихъ хъубкьур кIури, умуд кивдихьа. Му жюрейин талитар гъахували жигьил спортсменариз ужуб тажрубара тувра ва дурарик спортдин заан кIакIарихьна гъягъюз гьевесра капIра. Багарихьди Табасаран район машгьур апIру цIийи ва бажаранлу командйир ва баяр арайиз удучIвиди кIури, умудлу хьуз шулу», – гъапнийи дугъу.
Табасаран райондин волейболин командайи чан спонсор, ГьепIил гъул`ан вуйи Неби Гьяжимурадович Небиевдиз жаради чухсагъул мялум апIура, думу касди командайин пулихъди вуйи вари харжар чаина гъадагъну. Гьаддиз командайира волейболиан РД-йин чемпионатдиъ заан дережайин хъуркьувал улупну.
Гьацира командайи Табасаран райондин глава Мягьямед Къурбановдиз райондиъ спорт артмиш апIбаз фикир тувбаз аьхю чухсагъул мялум апIура.
Жикъи вахтнан арайиъ ужуб команда гьязур дапIну, думу республикайиъ заан дережайиз адапIбаз ухьу Табасаран райондин волейболин командайин капитан Садикь Уьсмановдизра, гьацира дугъан кюмекчи, Табасаран райондин культурайин, спортдин ва туризмдин управлениейин спортдин отделин начальник Низами Агъаризаевдизра аьхю чухсагъул кIурхьа. Хъа ихь командайиз гележегдиъ хъана заан хъуркьувалар гъазанмиш апIуб ккун апIурхьа.
