Гъубшу гьяфтайиъ Мягьячгъалайиъ республикайин образованиейин ва илимдин министерствойин коллегияйин яркьу заседание гъабхьну. Дидиъ республикайи образованиейин цирклиъ гъубху ляхнин натижйир гъивнийи.

 

Министр Ягь’я Бучаевди, заседаниейиъ удучIвну улхури къайд гъапIганси, Дагъустандиъ Образованиейин йис вуди мялум дапIнайи 2022-пи йисан планламиш дапIнайи вари серенжемар кIули гъухну, гьадму гьисабнаан 2030-пи йисаз образование артмиш апIбан концепция ва тербияйин артмиш’валин программара тасдикь гъапIну.

Мидланра савайи, йисандин арайиъ республикайиъ 191 мектебдин 210 дарамат рас дапIну, дурар лазим вуйибдихъди тямин гъапIну, ва му метлебариз уьмуми кьадар 4,4 млрд манат харж гъапIну.

Зиихъ къайд дапIнайи концепцияйиз асас вуди, дагъустандин мектебариъ шубубпи сменайиъ урхувал зат имдарди ккутIбанди, хъа кьюбпи сменайиъ урхурайидарин кьадар 14,4% кам апIбанди ву. Гьамусяаьт республикайин 33 мектебдиъ гьелелиг шубуб сменайиъ урхувал гъубзра. Дурарикан 19-диъ му месэла, гьамусяаьт тикмиш апIурайи цIийи мектебар ишлетмиш’вализ тувбиинди, 2024-пи йисан аьхириз гьял апIбанди ву.

Министрин заместитель Аида Далгатовайи «Урусатдин Федерацияйин образование-йин гьякьнаан» Федеральный къанундиъ дигиш’валар тIаъну, цци мялимарин ляхниъ бюрократияйин гъагъ кам гъапIуваликан, яна мялимди ацIну ккуни документарин сиягь цIиб дапIну, дугъаз чан пишейин асас буржйириз – бицIидариз аьгъювалар ва тербия тувувализ – вахт азад гъабхьиваликан гъапну.

Коллегияйин заседаниейин дахилнаъди образованиейин ужударстар 5 гъуллугъчийиз ва «Жигьил мялим» конкурсдин 9 гъалибчийиз пешкешар тувнийи.