22-пи декабриъ Хив райондин РКДЦ-йиъ «Чирагъ нирин мукьмар» фестивалин натижйир гъивнийи.
Фестивалиъ гьам жигьил, гьамсана хайлин йисари сягьнайиин лихурайи 13 табасаран ва лезги халкьарин мяълийирин устадар иштирак гъахьнийи. Дурарин арайиъ Дагъустан Республикайин культурайин лайикьлу гъуллугъчира кмиди айи.
Фестивалиъ иштирак шлударихьна вуйи асас тIалабар – халкьдин палатдикди, фонограмма хътарди, анжагъ чIиви сесниинди мяъли апIувал, мяълийин гафарра мукьамра муганайиз наанкIа ишлетмиш дапIну адрудар, аьнтIикьадар хьувал вуйи.
Конкурсдин иштиракчйирин устадвализ кьимат заан кеспагьли-йиркан ибарат вуйи жюрийи дивнийи. Дидин дахилнаъ Дагъустан Республикайин лайикьлу артистар – Марьям Къазиева (жюрийин председатель), лезги халкьдин театрин артист Руслан Пирвердиев, Дагъустан Республикайин культурайин лайикьлу гъуллугъчйир – Республикайин халкьдин яратмиш апIувалин хулан отделин кIулиъ айи Минажат Мурадова ва табасаран эстрадайин машгьур артист Надинбег Къазиев, хъа гьацира Табасаран райондин бицIидарин яратмиш’валин хулан музыкальный руководитель Уружбег Аьлиев айи.
Фестивалиъ 1-пи йишван ва 20000 манатдин сагьиб лези халкьдин вакил Надир Гьясанов гъахьнийи. Жюрийи 2-пи йишв ва 15000 агъзур манатдин премия табасаран артист Нурудин Аьбдулаевдиз тувнийи, хъа 3-пи йишв ва 10000 агъзур манат чпин арайиъ Эрзиман Уьсмановди ва Рустам Рамазановди пай гъапIнийи.
Фестивалин имбу иштиракчйирра сертификатариинди ва пешкешариинди лишанлу гъапIну.
Республикайин халкьдин яратмиш апIувалин хулан отделин пишекар, Дагъустан Республикайин искусствойин лайикьлу гъуллугъчи Аьбдурягьман Шагьмиловди серенжемдин аьхириъ республикайин культурайин министр Зарема Бутаевайин терефнаан Хив райондин администрацияйин культурайин, спортдин, жигьиларин политикайин ва туризмдин отделин кIулиъ айи Казбек Къазиевдиз, культурайин цирклиъ гъазанмиш дапIнайи хъуркьувалариз лигну, чухсагъул мялум апIру кагъаз тувнийи.
Йиз тIалабниинди, фестивалин жюрийин вакилари Марьям Къазиевайи ва Минажат Мурадовайи му серенжемдин гьякьнаан чпин фикрар ачухъ гъапIнийи.
«Гъи, халкьдин культурайихьна, чIалнахьна, аьдати фольклорин тарихнахьна вуйи янашмиш’вал кьит шулайиган, му ляхниз улихь-кIулихь хьайидарин терефнаанра саб артухъ иб тутруврайивал гъябкъиган, ухьу, жвувканра иливну, чарасуз му жюрейин чIиви ляхин кIули дубхну ккунду. Хив райондикан улхуруш, мушваъ гъи тешкил гъапIубсиб жюрейин серенжемар гъахувал аьдат дубхьна. Гьаддиз, райондиз регьбервал туврайи Ярмет Ярметов кIулиъ ади, вари администрацияйиз ва гьацира, жаради культурайин, спортдин, жигьиларин политикайин ва туризмдин отделин кIулиъ айи Казбек Къазиевдиз марцци кIваан чухсагъул ва аферин мялум апIуз ккундузуз.
Гъийин фестивалиин кьадарсуз рази вуза. Мидин асас метлеб – райондиъ мяълийир апIбан бажаранвал кайи жигьилар ашкар апIури, дурариз кюмек тувувал ву. Гьяйифки, вари артистар пландиъ тувнайиси гьязур духьнадайи. Му гъалатIниин дурар гъюру ражари артухъси лихуб ккун гъапIунза. Гъит инсаниятдин арайиъ гьар вахтна варитIан кIубанур гъалиб ишри ва гьацира аргъаж шулайи насларин гевюлариъ аьсрариинди мукьмарин сес ибшри!» – гъапнийи Республикайин халкьдин яратмиш апIувалин хулан отделин кIули айи Минажат Мурадовайи.
«Сифте узуз Казбек Зейнудиновичди «Чирагъ нирин мукьмар» кIуру фестиваль гъабхуз фикриъ айиз гъапи вахтна, му ихь аьдати концерт вушул кIури, хиял гъабхьнийиз. Хъа ваъ, диди гъи учв аьдати концерт даруб ва ихь культурайин хатIнаъ чан хусуси йишв бисурайиб субут гъапIунхьуз. Мидин заанвал гьаддиъ аки, гъийин йигъаз, узуз айи мялуматариинди, му жюрейин фестиваль – иштиракчйири фонограмма дарди, анжагъ чIиви дихниинди мяъли апIури, мидланра савайи милли палтар алди, апIурайи мяълира жуван гафариз ва мукьмиз дибикIнайиб вуди – гьелелиг саб йишваъра кIули гъубхундар. Артистари, бюлбюл жакьвариси, табасаран ва лезги халкьарин рюгь ва ирс кайи чпин бажаранвал улупнийи. Гъапиш хътругъара, му фестивалин гьавйир гъяркъган, валлагьи, йиз бицIи вахтар кIваина гъахьунзуз. Саб дупну уларикк гъулариз, культурайин хулариз кинйир хури, проекториинди дурар улупурайи вахтар фикриз гъафнийиз. Думугандин инсанарин разивал, шадвал сар-сарихъди пай апIуз аьгъювал кIваина гъафнийиз. Гъит дюн’яйиъ ислягьвал ва райондиан Чирагъ нирин мукьмарин сес кам дарибшри», – къайд гъапнийи Марьям Къазиева.
