Хив райондиъ генерал Абачевдиз турнир бахш гъапIну

 

 

27-пи ноябриъ Хиварин гъулан спортдин мектебдиъ Урусатдин Игит, Луганск Халкьдин Республикайин Игит, ЛНР-ин Халкьдин милицияйин 2-пи армияйин корпусдин командующий генерал-майор Эседуллагь Абачевдиз бахш дапIнайи, армияйин жюрейиинди хиларихьди кчIихбан ватанпервервалин турнир кIули гъубшну. Дидиъ СКФО-йин регионариан вуйи хиларихьди кчIихбаан ужударстар 200-дихьна спортсменар иштирак гъахьну.

Серенжемдиз лигуз ихь кьюбиб районариан, Мягьячгъала, Дербент, Каспийск шагьрариан хайлин гьюрматлу хялар, хъа гьацира Игитрин дада Угълан Абачева, дугъан уьмрин юлдаш Наима Абачева ва Абачевдин мирас-варис ва гъуландар гъафнийи.

Луганск Халкьдин Республикайин глава Леонид Пасечникди, турнир тешкил гъапIдариз чухсагъул мялум апIури, гьюрматнан кагъазра хътIапIнийи. 
Турнириъ пешкешнан йишвар гъадагъдариз Игитрин ччвурнахъан дипломар, грамотйир, гьюрматнан кагъзар, кубокар, медалар, чIулар, пул айи конвертар, ЛНР-ин терефнаан вуйи пешкешар тувнийи.

Талитариъ 70-75 кг гъагъ айи спортсменарин арайиъ сабпи йишв Хив гъулан агьали Гюльмягьямед Гюльмягьямедовди гъибисну. Хив райондин вакилар пешкешнан йишварин сагьибарра гъахьну.