Шубурпи Игит
Табасаран райондин ТIаттил гъулаъ бабкан гъахьи Руслан Къурбановди мектебдиъ урухури имиди чан кьисмат армияйихъди аьлакьалу апIуз кьаст гъапIнийи. Дугъу шубуб военный вуз заан аьгъювалар ади ккудукIну. Украинайиъ кIули гъябгъюрайи хусуси метлеб айи дявдин операцияйиъ саки сифте йигъариланмина иштирак шула. Женгариъ кьюбан гъагъи зийнар гъахьну.
Руслан Къурбановди ва дугъан хиликк ккайи танкарин взводди юкьуд йигъандин арайиъ гъати женгар гъахури, душмнарин дявдин 38 машин ва 15 танк, миномётариан йивурайи 2 батарея ва 250 нацистар терг гъапIну. Украинайин сяргьятариин гъягъюрайи дявдин гьяракатариъ заан дирбаш’вал улупбаз лигну, 25 йисан яшнаъ айи Руслан Къурбановдиз уьлкейин кIулиъ айирин указдиинди Урусатдин Игитрин ччвур ва «Гъизилин Хяд» медаль тувну.
