Кьибла Дагъустандиъ туризм чарасуз артмиш дапIну ккунду

 

 

Гъи Дагъустан, туристар кьабул апIбиинди, Урусатдин регионарикан 2-пи йишв’ин ал. Му цирклиъ гьял дапIну ккуни месэлйирикан хайлин йисари экскурсйир гъахрурди лихурайи ихь ватанагьли Зульфия Багъдаевайи гьамци кIура:

– Дагъустан чав гизаф уччвуб регион ву. Табиаьтдихъди, тарихи ва архитектурайин ядиграрихъди фукьан вушра девлетлуб. Дагъустандиз дуфнайи туристар, чпиз шиклариан, видеойиан гъяркъю йишварихьна хъади гъушган, душвариъ лазим вуйи шартIар адрували гизаф мюгьтал апIура. Пуз шулу, гьелелиг, Дагъустан туризм яркьуди артмиш апIувалихьна гьязурди адар. ВаритIан читинуб – рякъяр адрувал ву. Му месэла чарасуз вуди гьял дапIну ккунду.

Зульфия Багъдаевайи гъи ихь кьюбиб районариъ туриствалин циркил артмиш апIуз хайлин чарйир зигура. Дугъу Дагъустандиз гъюрайи туристар табасаран халкьдин варитIан ужудар аьдатарихъди, табиаьтдин ва тарихдин уткан ядиграрихъди таниш апIура.