Сарсана Игит
Цци учу газат урхрудариз туву хабрарикан варитIан аьламатнануб табасаран миллетдиз Советарин Союздин игит ади хьуваликан ву. Думу 1918-пи йисан 13-пи октябриъ гьамусдин Табасаран райондин Гъярихъ гъулаъ бабкан гъахьи Расулов Рашид Мевлюдович вуди гъахьну. Дугъаз Финляндияйиъ гъахьи дявдин гьядис-йириъра иштирак хьувал алабхъну. Ватандин Аьхю дяви ккебгъган, сабпидарди женгназ гъурхдаригъ думура гъяйи.
1964-пи йисан абцIу дявдин билетдик думу Рашид Мевлюдович Рассоловси улупна. Хъа дявдин вахтари думу Рассолов ваъ, Расулов вуйи. Рашид Расуловдиз «Советарин Союздин Игит» кIуру ччвур тувуз документар Москвайиз хъадаънайи. Ва думу параддин вахтназ чаз му багьа награда тувбаз ккилигурайи. Саб кьаза багьна дубхьну, дугъан документар батIул гъапIну, хъа учв Рашид Расулов лагериз гьаъну.
Багъри юрдариз думу Рассолов фамилияйиккди 1957-пи йисан хъадакну гъафну ва Огни шагьриъ чан хизандихъди 2001-пи йисазкьан яшамиш гъахьну.
