Ялхъвнин чIалниинди хасиятнан лишнар ачухъ апIура…
«Лезгинка» ансамблиъ вари йисари РД-йин 75 лайикьлу артистари, РД-йин 9 халкьдин артистари, Советарин Союздин 1 лайикьлу артистди ва заан ччвурар айи хъана жара артистари ляхин апIури гъахьну. Гьадрарин арайиъ ихь миллетдин вакил Жамиля Мамедовара а. Думу Хив райондин Хив гъулан агьалйирин хизандиъ Мягьячгъала шагьриъ бабкан гъахьну.
БицIидихъанмина му пишейиин гизаф юкIв али риш, 11-пи классдиъ урхури имидитIан, ансамблиз ляхнизра гъягъюри гъахьну. «Лезгинка» ансамблихьна вуйи рякъ, гьелбетда, рягьтиб дайи, амма дидин натижайи кIваъ айи умударихъна хруган, шурхан вари читинвалар ккагъуз удукьну. Гъи, 23 йисан ансамблиъ ляхин апIури, Жамиляйиз дюн’яйин аьхюбсиб пай уьлкйириз гъягъювал кьисмат гъабхьну.
2022-пи йисан дугъаз «Дагъустан Республикайин халкьдин артист» ччвур тувну.
