РД-йин спортдин министр Сажид Сажидовди республикайин журналистарихъди вуйи пресс-конференцияйиъ чав кIулиъ айи министерствойин 2022-пи йисандин ляхнин натижйир гъивну. Дугъу къайд гъапIганси, Дагъустандиъ 1 миллионна 557 агъзур агьалйир спортдиин машгъул духьна. Му республикайиъ дуланмиш шулайи 3 йислан 79 йис’ина яш айи вари агьалйирин кьадарнакан 54,1 процент ву.
Министрин гафариинди, вари халкьарин санкцйириз дилигди, 2022-пи йис дагъустандин спортдиз хъуркьувалар айиб гъабхьну. Республикайин спортдин мектебариъ урхурайи баяр-шубари заан натижйир гъазанмиш гъапIну.
«2022-пи йисан Дагъустан Республикайин спортсменари 2 агъзурихьна медалар гъазанмиш гъапIну, дурарикан 600 – заан дережайин. Му цифрйир аьхиримжидар дар», – гъапну министерствойин кIулиъ айири.
ВаритIан асасдар вуди Сажид Сажидовди тек-батек кчIихбариан Ислам Мягьячевди UFC, хъа Уьсман Нурмягьямедовди Bellator спортдин тешкилатариъ гъадагъу гъалибвалар улупну. «Ислам Мягьячев Гьябиб Нурмягьямедовдин кьяляхъ ММА-йин кчIихбарин варитIан машгьур жюрейиан чемпионвалин чIул гъазанмиш гъапIу Дагъустандин кьюрпи спортсмен ву. Хъа Уьсман Нурмягьямедовди Дагъустандиан сарпир вуди Bellator тешкилатдин чемпионвалин чIул хьади гъафну. Мидланра савайи, кчIихбариъ гьякьлуди гъалибвал гъадабгъну, амма UFC спортдин тешкилатдин гъалибвалин чIул тутруву Мягьямед Анкалаевдиканра дарпиди гъибтуб дюз дар», – аьлава гъапIну дугъу.
Министри пресс-конференцияйиъ республикайиъ спортдин дараматар тикмиш апIуваликанра ктибтну.
2022-пи йисан, федеральный центрин ва республикайин тялукь программйир уьмриз кечирмиш апIури, Дагъустандиъ спортдин 33 дарамат тикмиш дапIну, гьяракатнаъ ирчну: футболин 13 майднар, тренажерар алди спортдин 12 майдан, спортдинна сагъламвал уьбхбан 2 комплекс, спортдин 3 зал ва теннисдин 3 корт. Гьацира Дербент шагьриъ ва Хасавюрт райондин Эндирей кIуру гъулаъ физкультурайинна сагъламвал уьбхбан комплексар, Нугъай райондин Терекли-Мектеб гъулаъ стадион тикмиш дапIну ккудукIура.
Мягьячгъалайиъ Елена Исинбаевайин ччвурнахъ хъайи стадиондиинра рас апIбан ляхнар кIули гъягъюра. Кьюрдун танафусдин вахт ккудубкIиган, мягьячгъалайин футболин клуб «Динамойи» чан матчар душв’ин гъахиди.
РД-йин спортдин министерствойи багахь гележегдиъ Каспийск шагьрин «Труд» стадионра рас апIуз планламиш апIура. Душваъ аьхю теннисдин тамшир тешкил апIуз шлусдар кортар тикмиш апIуз кка.
Мягьячгъалайин «Динамо» стадион республикайин балансдиина дубхну, гележегдиъ думура рас апIбан ляхнар кIули гъахбанди ву.
Сажид Сажидовди Мягьячгъала шагьриъ айи Жвумийин мистан багахь ерлешмиш дубхьнайи спортдин дараматра, расвалин ляхнар ккудукIну, багарихьди ишлетмиш’вализ тувруваликан гъапнийи. Думу спорткомплексдиъ, аьхю бассейн ади, штун спортдин жюрйирин центр ерлешмиш хьибди.
