Гъябгъюрайи йис Урусатдин РД-йиъ айи МЧС-дин кIулин управлениейиз гъагъиб гъабхьну. 2022-пи йисан республикайин МЧС-дин гъуллугъчйири жюрбежюр хатIалу ва цIа кабхъувалин 3800 дюшюшдиъ 399 кас аьжалихьан гъюрхну.
«Учу жавабдарвал гъабхурайи ляхин лап важиблуб ва яркьу терефар айиб ву. Гьаддихъди сабси ич улихь тамам апIуз дивнайи метлебарин кьадарра бицIиб дар. Амма, гъябгъюрайи йисан республикайиз гъюрайи туристарин кьадар артухъ гъабхьивалихъди аьлакьалу вуди, учу ихь хяларин хатIасузвал тямин апIувализ асас фикир туври гъахьунча. Яна сатIиди гъахурайи хайлин серенжемарин прог-рамма тартиб гъапIнийча. Гьадму гьисабнаан туристар гъягъру маршрутариъ хатIасузвал уьбхювал, рякъяриъ, штун объектариин (гьюл, даграр, нирар) гъахьи хатIалу дюшюшар вахтниинди гьял ва марцц апIувал ва гьацира жарадар.
Къайд апIуб лазим вуки, аьхиримжи 10-12 йисан республикайиъ МЧС-дин цирклиан гъабхурайи ляхнин кюмекниинди ухьу му кьадар туристар гъювализ гьязур гъахьунхьа. Урусатдин МЧС-дин ва Дагъустандин кIулиъ айидарин кюмекниинди гьар йисан Дагъустан Республикайин аьт-рафариин кью-кьюб цIа кабхъувалин хатIалуваларихьан уьрхру вая къутармиш апIру подразделенйир арццра. ЦIа ктIубшвру ва къутармиш апIувалин деврин техника масу гъадабгъура», –гъапну Урусатдин РД-йиъ айи МЧС-дин кIулин управлениейиз регьбервал туврайи Нариман Къазимягьямедовди.
Дугъу къайд гъапIганси, 2022-пи йисан Дагъустан Республикайин аьт-рафариин 3846 цIа кабхъувалин дюшюшар гъахьну. Думу бедбахтвалариъ 23 кас гъийихну. Дурарин гьисабнаъ 3 бицIир а, 31 касдиз гъагъи зийнар гъахьну. ЦIа кабхъувалин дюшюшар арайиз гъюбан натижайиъ инсанариз 355 миллионна 530 агъзур манатдин зарар гъабхьну. Статистикайин улупбариинди, республикайиъ цIа кабхъувалин дюшюшар цIиб гъахьну пуз шулдар. Амма бедбахтвалин дюшюшариъ бицIидар ва инсанар кечмиш хьувалин кьадар ис гъабхьну.
Нариман Къазимягьямедовдин гафариинди, цIа кабхъувалин асас дюшюшар электричествойин, газдин пичарин, турбйирин ва жара алатарин къайда дюрюбхди ишлетмиш апIурайивалиан, кьастниинди цIа кипувалиан арайиз гъафидар ву.
Урусатдин РД-йиъ айи МЧС-дин кIулин управлениейиз аьхиримжи 3 йисан цIа кабхъувалихьан уьрхру 6 автоцистерна, 13 пучIу жюрейин автомобилар, 3 пассажирар гъахру ва 4 гъагъ гъабхру машинар, мидланра гъайри, цIа кабхъувалихьан уьрхру ва жара техникайин 10 жюрейин алатар жара гъапIну.
Аьдат вуйиганси, ЦIийи йисандин серенжемариъ цIа кабхъувалихъди аьлакьалу дюшюшар артухъ шулу. Асас вуди дурар пиротехника дюз дарди ишлетмиш гъапIувалиан арайиз гъюру. Гьаддиз, гьюрматлу ватанагьлийир, фуну вахтна вушра мугъаятвал уьбхюб лазим ву.
