Гъябгъюрайи йисан ЕГЭ-йиъ иштирак хьуз тувру аьрзйир 1-пи феврализтIан кьабул апIурадар. Мидкан региондин мялуматар тартиб апIру центрин пресс-гъуллугъну хабар тувнийи.

 

 

«ЕГЭ-йиъ иштирак шулайидари, имтигьян тувуз кадагънайи предметарра улупну, 2023-пи йисан 1-пи февраль улубкьайиз аьрза тувну ккунду. 2023-пи йисандин выпускникари ЕГЭ тувбан аьрзйир чпин мектебариъ ацIру. Хъа улихьна йисан мектеб ккудубкIдар муниципальный органарин образованиейин управленйириз илтIикIну ккунду», – дупна думу мялуматнаъ.

Аьрзйир чпи выпускникари вая дурарин абйир-бабари, ясана къанундиинди улупнайи дурарин вакилари ацIру. Улихьна йисари мектеб ккудубкIу выпускникари аьрза абцIру вахтна, дидихъди сабси гъадабгънайи образованиейин гьякьнаан асулин документар вая нотариусди тасдикь дапIнайи дурарин копйир тувну ккунду.

2023-пи йисан ЕГЭ тувру вахтра тяйин дапIна. Гьаци, улупнайи вахтназ улихь тувру ЕГЭ 20-пи мартдилан 19-пи апрелиз, хъа асас ЕГЭ – 26-пи майдилан 1-пи июлиз, ва аьлавади тувру ЕГЭ – 6-19-пи сентябриъ кIули гъя-гъиди.

ЕГЭ-йихъди аьлакьалу суалариз жавабар ва лазим вуйи мялуматар, РЦОИ-йин «горячий линияйин» 8 (938) 796-99-90 вая 8 (8722) 51-56-33 телефонарин нумрариз зенг дапIну, гъадагъуз шулу.