14-пи январиан 15-пи январиз йишвну Хив райондин АрхътIарин гъул’ан райондин центризди ва миди вуйи гъуларизди чалантина рякъ гъябгъюрайи гъядуъ 15-20 см яркьушин айи тIуркIбар арайиз гъафну.

 

Мидкан райондин агьалйириз райондин ГО-йин, ЧС-дин ва ЛПСБ-йин отделин кIулиъ айи Байрамбег Ибрагьимовди хабар тувнийи.
«Вахтназ вуди рас апIбан ляхнар кIули гъахурайивализ лигну ва инсандин сагъламвал уьбхбан гъайгъушнаъ ади, гъядлантина гъягъювал хъябкьна. Райондиз гъюру-гъягъру рякъяр Ккугъ, Дардаркент ва Сардаркент гъулариантина тешкил дапIна. Дидихъди сабси, зиихъ кудухнайи гъулариантина илтIикуб-хътIикIуб гизаф ярхлади ву-йивализ лигну, улупнайи гъядун багахь ерлешмиш дубхьнайи улихьгандин йирси гъядухьна гъюрайи рякъюъ расвалин ляхнар кIули духну, думу гъядра вахтназ вуди абццнахьа. Рас апIбан ляхнар ккудукIайиз машинар хъаувал гьаму жюрейиинди тешкил апIидихьа» – ктибтнийи чан улхбаъ МЧС-дин гъуллугъчийи.

Гъядун гьял ахатармиш апIуз ва рас апIбан ляхнариз удубчIвру кьимат тяйин апIуз Мягьячгъалайианра пишекрар гъафну. Дурарин дестейиъди «Стройлайн» ООО-йин кIулин инженер, фирмайин подрядчик Аьгьмад Гимбатов ва «Транспроектдин» ООО-йин ИПТС-дин директор Гьяйбуллагь Гьяйбуллаев дуфнайи.

«1990-пи йисан тикмиш гъапIу гъядукк ккудубкьнайи саб шалман цIиб гьудубчIвну. Мици хьпан асас тахсир учIвру аяз айи гьавйириъ ва гьаму ара-йиъди швнуб-саб тоннайин гъагъ ади гъягъюрайи КамАЗ-ариъ рякъюрачуз. Дици гьял апIуз даршлу месэлйир му-шваъ адар. Хъа вушра кIули духну ккуни ляхнар хайлин а, сабпи нубатнаъ гъядун шалмнар зиълан чиб-чпик китIрайи рукьанна бетондин ригелар мюгькам апIуб. Гьаддиз райондин агьалйирикан цIиб сабур апIуб ккун апIурча. Гьавйириз дилигди, учу саб 10-12 йигъандин арайиъ рас апIбан ляхнар кIули гъахидича ва гъяд фукIа дархьибси абццдихьа», – гаф тувнийи дуфнайи пишекрари.