Цци 24-пи январиъ Дагъустандиз Урусатдин оборонайин министрин заместитель Тимур Иванов гъафнийи. Региондин Глава Сергей Меликовдихъди думу Мягьячгъалайин «Ипподром» райондиъ тикмиш апIурайи мектебдиз лигуз гъушну ва душваъ гъахурайи ляхнарихъди таниш гъахьну.
1224 бицIириз йишв айи мектеб «Образование» милли проектдин дахилнаъди тикмиш апIура. 26 агъзур квадратдин метр яркьушин айи дарамат 4 блокдиз пай дапIна: филологияйин дарсар кивру корпус, шубуб мертебайин ккергъбан классарин корпус, жямяаьтлугъ илмарин дарсар кивру корпусдиъ бицIидариз хураг гьивру йишвра, актовый залра ерлешмиш дапIна, дарсар кивру шубуб мертебайин дараматдиъ сирнав апIру бассейнар айи спортдин зона, кьюб мертебайиз гьачIарккнайи спортдин залар а.
Мектеб тикмиш дапIну, 2023-пи йисан ишлетмиш’вализ тувбанди ву. КIваина хурача, 2022-пи йисан республикайиъ «Демография» ва «Образование» милли проектарин дахилнаъди 51 мектеб ва бицIидарин 59 багъ тикмиш дапIну, ишлетмиш’вализ тувнийи.
Учв Дагъустандиз дуфну имиди Тимур Иванов Мягьячгъалайин «Ипподром» райондиъ тикмиш дапIнайи, 200 бицIириз йишв айи бицIидарин багъдиз ва цIийи военный госпиталь тикмиш апIуз хъюгънайи йишв’ина гъушну. Гьацира дугъу Дагъустандиъ айи Каспийин флотилияйин инфраструктура ахтармиш гъапIну.
«Ипподромдин» райондиъ тикмиш апIурайи цIийи мектебдиз гизаф абйир-бабар ккилигурайи. «Багахь хьайи 53-пи нумрайин мектебдиъ баяр-шубар 3 сменайиъ урхура. Гизаф бицIидар 56-пи, 50-пи, 29-пи нумрйирин мектебариз гъягъюз мажбур шула. Хъа думу мектебариъ айи аьгьвалатра тялукьуб ву. Йиз худул урхурайи классдиъ 47 бицIир а. Саки 50 бицIирин идара апIру мялимдин язухъ дарин? Хъа шубубпи сменайин кьяляхъ хулаз гъюру бицIидарин гьял фициб шулу? Хябяхъган ляхнариан гъюрайи инсанар айи маршруткйир ацIну шулу, бицIидарихьан вахтниинди маршруткайиъ эуз шулдар. Кьюрдун вахтна хябяхъган мучIу дубхьнади шулу, бицIидар мектебдиан гъюру вахтна, кIвак гъалабулугъвал кади ккилигури, кми-кмиди дурарин улихьна удучIвури шулза. Учу яшамиш шулайи йишван багарихь мектеб ачмиш апIбаз аьхю машквризси килигураза», – гъапнийи «Ипподром» райондиъ дуланмиш шулайи агьали Надира Мягьямедовайи.
