Январин 30-пи йигъан Хючна гъулаъ Табасаран райондин глава Мягьямед Къурбановдин регьберваликкди райондин мектебариъ гьюкуматдин натижа йивру аттестацияйин (ГИА) имтигьнар гъахру пунктар гьязур апIбаз бахш дапIнайи совещание кIули гъубшну.

 

 

Совещание ачмиш гъапIу Мягьямед Къурбановди ЕГЭ ва ОГЭ тешкил апIбан ва кIули гъахбан ляхин чан гюзчиваликк ккайиваликан, имтигьнар гъахру пунктариъ вари тIалабар тамам дапIну ккуниваликан гъапнийи.

Имтигьнар гъахру пунктариъ ГИА гъабхуз апIурайи гьязурлугвалин ляхнарикан райондин образованиейин управлениейин кIулиъ айи Аьбдусалам Гьясановди ктибтнийи. Дугъан гафариинди цци райондиъ 345 выпускникди ЕГЭ ва 816 урхурайири ОГЭ тувну ккунду. Имтигьнар тувбан бадали, 3 ППЭ – Хючнаарин сабпи нумрайин лицей, Хянгъярин ва ТIаттларин кьялан мектебар гьязур апIура.

Райондин кIулиъ айири совещаниейин иштиркчйирикан имтигьнар гъахру пунктар техникайин вари дакьатарихъди тямин апIувал тIалаб гъапIну. «Электроэнергия тувру дакьатар, аьлакьа, видеойин гюзчивал гъабхру гъурулуш, компьютерарин техника, харж шлу материалар ва гьацдар жара алатар гьязурди ади ккунду. Гьязурлугвал ккебгъуз вахт ву. Гьарсаб пунктнаъ фу гьубкIрадарш, ахтармиш апIинай. Мектебарин директорари гьубкIри адру техникайин гьякьнаан аьрзйир дидикIну, райондин администрацияйиз хъадаай», – буйругъ тувну Мягьямед Къурбановди.