Дагъустандин аьтрафариин сагъламвал уьбхбан цирклин гьяракатнаъ ипнайи модернизацияйин программа гележегдиъра давам хьибди. Мидкан ва республикайиъ «Сагъламвал» милли проектдин дахилнаъди кIули гъахурайи серенжемарикан РД-йин сагъламвал уьбхбан министр Татьяна Беляевайи улихьнаси Дагъустандин Главайин регьберваликкди кIули гъубху Советдин заседаниейиъ ктибтнийи.

 

 

Татьяна Беляевайи къайд гъапIганси, гъубшу йисан модернизацияйин программайиинди республикайин дагълу районариъ ерлешмиш духьнайи больницйир деврин медицинайин 379 авадлугъдихъди тямин гъапIну, гъулариъ айи медицинайин 50 идарайиъ расвалин ляхнар кIули гъухну, медицинайин 5 идара бинайиан цIийи алаъну. Дидланра савайи, деврин цIийи техникайихъди тямин дапIнайи 40 цIийи ФАП-ар, участокарин больницйир ва духтрарин амбулаторйир арццну, саки вари районариз санитарвалин автотранспортдин 90 аьдад хътаъну.

Дербент райондин ва Дербент шагьрин медицинайин идарйиризра санитарвалин автотранспортдин швнуб-саб машин жара гъапIну. Республикайин кьибла шагьрин агьалйириз сабсана шад апIру хабар – РД-йин сагъламвал уьбхбан министерствойи Дербент шагьрин кьялан больницайиз гъагъи ва сагъ апIуз даршлу уьзрар кайидарин уьмрин ери ужу апIуз паллиативный кюмек тувру машинра жара гъапIнийи.

Гьамус гъагъиди иццурайи касдиз лигуз йишв’ина гъушу вахтна медицинайин гъуллугъчйириз гьадушваъ имиди анализар гъадагъуз, УЗИ-йин ва кардиограммайин ахтармишар гъахуз мумкинвал хьиди. Ахтармишарин кьяляхъ, иццурайи кас амбулаторияйин къайдайиинди хулаъ сагъ апIуруш вая больницайиъ ккаъруш, духтрарин комиссияйи гьял апIуру.