Хив гъулаъ райондин культурайин хулаъ февралин сабпи йигъланмина гьяфтайиъ кьюбан (яна гьербе ва хамис йигъари) шубариз ялхъвнар улупбан дарсар кивувал ккебгъна.

 

 

Ялхъван дубгъуз гъюрудар кьюб дестейиз пай дапIна. 1-пи десте 5 йислан 10 йис’ина гъяйиз яшариъ айидар ву, ва дурариз ялхъвнар дургъуз саб вазли 600 манат тувди, хъа 2-пи дестейин 10 йислан 30 йис’ина вуйидарин му ляхниз 1000 манат удубчIвиди.

«Дюзди гъапиш, ихь райондин агьалйир лап ухдианмина илтIикIурайзухьна. Гьяйифки, Мирайи (ялхъвнарин дарсар кивру мялим) дарсар анжагъ шубаризтIан кивударза кIура.
Саб Хив гъул’ан ваъ, хъа миди вуйи гъуларианра гъюз мумкинвал гъабхьнийиш, ужуди рябкъюри азуз. Фицики ялхъвниъра халкьдин культура, тарих, рюгь ва ирс а. Гъи райондин культурайин хулаъ, ужудар заларилан, алабхьру палатдилан ккебгъну, лазим вуйи мукьмариина гъяйиз, далдабу, зурна ва чIагъан йивру кьавларара а. Сифте Мирайин дарсар фици кIули гъягъюруш, агьалйириз бегелмиш шулуш, гевюл ва кьимат фициб шулуш лигухьа, хъасин, баяриз дарсар кивру мялимра агуз шул», – чан ниятарикан ктибтура райондин культурайин, спортдин, жигьиларин политикайин ва туризмдин отделиз регьбервал туврайи Казбек Къазиевди.

«Узу бицIидихъанмина ялхъвнариин ва мяълийириин гизаф юкIв алир вуза. Вич, вичун гьархьан ярхлаъ дабхъидар гъапиганси, йиз дадара табасаран халкьдин мяълийирин устад ву (Адият Гьямзаева). Гьаддиз, белки, дадайин мяълийирихъди, мукьмарихъди ва ялхъвнарихъди уьлдюбгъюрайи гевюлин цIюмгълар узухьнара гъурукьуншул. Сифте 1-пи классдианмина Дербент шагьрин 9-пи нумрайин мектебдиъ урхуз хъюгъюр, хъасин РД-йин ва РФ-дин искусствойин лайикьлу гъуллугъчи, хореограф, жугьуд миллетдин театрин директор Лев Манахимовдихь халис Кавказ халкьарин ялхъвнар дургъури гъахьнийза. Гьамци жа-жара мектебаризра гъягъюри, ялхъвнариин машгъул гъахьунза. Мектеб ккудубкIбалан кьяляхъ урхуз кучIвну, социологдин аьгъювалар гъадагънушра, цIиб вахтна пишекарвалин рякъюъди ляхин гъапIнушра, ялхъвнарихъан ул хътIабццундариз ва юкIвра ккядябхъюндариз. Ялхъвнар йиз уьмрин пише вуйивалин гъавриъ гъахьунза. Москвайиъ «Мектебдин лезгинка» кIуру ччвур тувнайи ялхъвнарин мектебдиъ лихурайи Мугьямаднур Султановдихь, хъа гьамус Дербент шагьрин ДДЮТ-диъ лихурайи Валида Нагиевайихь аьгъювалар гъадагъураза. Кавказ халкьарин культура уьбхбак пай кивбахъ юкIв хъайиз. Удукьур дупну, умуд кивраза. Уз’ина дапIнайи хъугъ’вализ ва дивнайи теклифназ чухсагъул», – мялум апIура Мира Ибрагьимовайи (шиклиъ).