Дагъустандиъ, махлукьатлу спортдиз фикир туври, хайлин серенжемар гъахуз хъюгъна. Мисалназ, вари Урусатдиъ машгьур духьнайи, дагълу йишвариъ хайлин инсанар сатIиди иштирак шлу «Dagestan Wild Trail – 2023» жаргъбар республикайиъ тешкил апIури юкьубпи раж ву.
Махлукьатлу спортдин му серенжемар 2023-пи йисан мартдин 18-19-пи йигъари кIули гъягъиди. Гъубшу йисанси, ццира жаргъбан маршрут Куркли, Гергебил, Ирганай, Шамилкъала гъулариантина хьибди.
КIваин апIуз ккундучуз, 2022-пи йисан Дагъустандин 15-дилан 120-диина километр жаргъбарин марафонариъ Урусатдин жюрбежюр шагьрариан 1600-тIан артухъ инсанар иштирак гъахьнийи. Гъябгъюрайи йисан иштирак хьуз аьрзйир туврайидарин кьадар хъана артухъ ву.
