Мягьячгъалайиъ Оскардин ччвурнахъ хъайи кючейиъ шагьрин бицIидаринна живанарин сабпи нумрайин библиотека ерлешмиш дубхьна. Узу 8 йис улихьна душваз гъушу вахтна, думу аьдати советарин деврин, китабар урхру ва абонемент тувру кьюб заликан ибарат вуйи, йирсива саб тягьярин гьялнаъ айи китабарихъди ацIнайи стеллажар айи библиотека вуйи – цIибтIан акв адруб, хайлин вахтна ишлетмиш гъапIу мебель дивнайиб.
Гъубшу гьяфтайиъ нубатнан ражари библиотекайиз гъушунза ва душваъ духьнайи дигиш’валари гьяйран гъапIунзу – мушв аьдати библиотекади имдар, хъа деврин тIалабариз жаваб тувру, азад вахт адапIуз, жюрбежюр серенжемар гъахуз вари мумкинвалар айи, урхрудариз ужудар шартIар яратмиш дапIнайи, аку, уткан идара дубхьна. Гьамусяаьт мушваъ вари китабар цIийидар ву, компьютерар, робот-библиотекарь Мобби, пулсуз интернет ва жара цIийивалар а.
Библиотекайин кьюбпи уьмрикан узуз душваъ 2004-пи йисхъан мина, сифте библиотекарь вуди, хъасин методистди лихурайи ихь ватанагьли Муминат Гьяжиуьмаровайи ктибтунзуз.
«2020-пи йисан «Культура» кIуру федеральный милли проектдин дахилнаъди ич библиотекайи грантдин проект гьязур гъапIнийи ва конкурсдиз хътапIнийи. Проект гъалиб гъабхьнийи ва 2021-пи йисан 5 млн манат гъазанмиш гъапIнийича – гьаму дакьатарихъ Урусатдин культурайин министерствойи китабарихъди, лазим вуйи авадлугъарихъди, компьютерарихъди, мебелихъди ва жара шей’арихъди тямин гъапIунчу. Библиотекайин идара рас апIуз Мягьячгъала шагьрин администрацияйира 3 млн манат жара гъапIнийи, ва натижайиъ фу гъабхьнуш, увуз рябкъюравуз. Жикъиди кIуруш, му ихь республикайиъ ачмиш гъапIу сабпи модельный библиотека ву, – ктибтнийи Муминат Гьяжиуьмаровайи.
Дугъриданра, дигиш’ва-лар хайлин духьна: муганаз айи кьюб залин ерина гьамус библиотекайиъ 5 зона а – урхрударин ва цIийиди удучIву китабарикан мялуматар тувру ва серенжемар гъахур зона (варитIан аьхюб), азад вахт адапIру ва хизандин зона, лаундж-зона, яна эргвал йивру – душваъ ахнар, гутйир а, ва бицIидарихьан ва дурарин абйир-бабарихьан дахъну китабар урхуз шулу; сагъламвалин шикаствал кайи бицIидариз вуйи ва мультимедийный зона – душваъ ягълишин ис-за апIру столар, креслойир, махсус литература ва пандус, виртуальный аьйнарар, ибариин алахьрудар а; аьхирки, коворкинг-зона – жигьилариз чпин жюрбежюр проектар кIули гъахуз мумкинвалар тувру йишв. Саб гафниинди, гъи библиотека гизаф маракьлуди азад вахт гьапIуз, интернетдиъ учIвну, лазим вуйи материалар гъадагъуз шлу центр дубхьна.
– Гьелбетки, му дигиш’валар гъахьихъанмина учухьна гъюрударин кьадарра кьюб ражари артухъ гъабхьну, дидланра савайи, гьамус библиотекайиз неинки бицIидар, хъа гьацира живанар ва жигьилар, аьхю яшнан касарра гъюз хъюгъна. Гьаддиз улихьгандин бицIидариз вуйи библиотека гъи официально вуди бицIидаринна живанарин библиотека дубхьна. Китабар урхувалра артухъ дубхьнайич. Китабарин фондра 60%-дин цIийи алапIну, багарихьди библиотекайиз хъана цIийи китабар тувди, – давам гъапIнийи ихтилат библиотекайин гъуллугъчийи.
– Гъийин деврин баяр-шубарин маракьар улихьна вахтаринсдар дар – дурари гизафси фантастика, аниме, магия жанрарин эсерар урхуру. Классикайин эсерарра урхуру – гизафси мектебдин прграммайиъ улупнайидар. Дюзди дупну ккунду, гьар жюрейин бицIидар гъюри шулу – шулугъар апIуз ккуни надинж бицIидар, интернетдиъ лихуз ккунидарра а, мульмедийный залиъ мультфильмар ва бицIидариз вуйи фильмариз лигуз иштагь айидар ва китабар урхбахъ дугъриданра юкIв хъайидар – гизафси гьадрарикан рази вуча.
Гъи, библиотекайин мумкинвалар яркьу, дидиъ гъулайвалар артухъ духьнайиган, гьамушваъ чпин серенжемар гъахуз ихтияр ккун апIури, гъирагъдилан жюрбежюр тешкилатарин вакиларра кми-кмиди илтIикIури шулу. Учу гьелелиг библиотекайин ужагъар ишлетмишназ пулсузди туврача. Ич заведующий Раисат Жалиловнайи, аьгъювалар гъадагъуз ккуни инсанарихьан пул бисуб дурус дар, кIура, – ктибтнийи йиз сюгьбатчийи
– Хъа учвухьна библиотекайиз вари бицIидарихьан гъюз шулин?
– Ав, шулу. Ичв бицIир хъади библиотекайиз дуфну, 60 манатдихъ сад йисазди вуйи урхрурин билет гъадабгъну ккунду. Гьаддиз, Мягьячгъалайиъ айи ихь ватанагьлийирихьна илтIикIури, дурариз чпин баяр-шубар учухьна хъади гъюбан теклиф апIураза. Умудлу вуза, дурариз мушваъ кьабул хьибди.
Шиклариъ: 1. Библиотека-йин заведующий Р. Къурба-нова ва методист М. Гьяжи-уьмарова (гагвлахъанди). 2. Библиотекайин лаундж-зонайиъ.
