Улихьна йигъари Хив райондин ЦIинитI гъулаъ А.М. Мягьямедовдин ччвурнахъ хъайи кьялан мектебдиъ Украинайиъ кIули гъябгъюрайи хусуси метлеб айи дявдин операцияйиъ ватандин маракьар бадали жвуван уьмур туву Росгвардияйин бицIину сержант Ринад Шагьбазовдиз гьюрматнан тахта абццбан серенжем кIули гъубшну.

 

Митингдиъ Хив райондин глава Ярмет Ярметов, дявдин частарин вакилар, Ринаддихъди сатIиди дявдин женгариъ гъахьи эскрар, гъуландар, мялимар ва майил-мадатар иштирак гъахьну.
Серенжем дявдинна политикайин ляхнариз лигру дестейин начальникдин аьхюну кюмекчи, майор Евгений Стояненкойи ачмиш гъапIнийи. Дугъу Ринад Шагьбазовдин игитваликан ва думу Урусатдин Президентдин къарарниинди Кьягьялвалин орден тувбиинди лишанлу дапIнайиваликан гъапнийи.

Хив райондин кIулиъ айи Ярмет Ярметовди Ринад Шагьбазовди, хайлин жара баяриси, чан жан Ватан бадали, ватанагьлийирин гележег бадали фида гъапIуваликан гъапнийи.

«Гьякьикьи эскрарин игитвалар уьмурлугдиз гъузру. Ихь игитарин абйир-бабарихьинди, уьмрин юлдшарихьинди, бицIидарихьинди илтIикIури, пуз ккундузуз, учу ич терефнаан вари удукьру кюмекар апIуз ва вари месэл-йир гьял апIуз гьязур вуча. Ринад ва жара игитар ихь юкIвариъ гьаммишандиз гъузди», – къайд гъапIну Ярмет Ярметовди.

Уч духьнайидар, Ринад Шагьбазовдин гьюрмат уьбхюри, саб дакьикьайиъ ккебехъну гъузнийи, хъасин думу кIваин уьрхбан тахта ачмиш гъапIнийи.

Асккан АьрхътIарин сельсоветдин глава Ариф Бугатиловди уч духьнайидариз игитрин уьмриканра яркьуди ктибтнийи.