Урусатдин оборонайин министерствойи Украинайиъ кIули гъягъюрайи женгарин гьякьнаан яркьуди мялуматар туврадаршра, саки сад йисанкьан давам шулайи дявдиноперацияйин натижйир гьелелиг инсанарин юкIвар шад апIрудар дар, аьксина, гьар йигъан гагь му терефнаан, гагьсана тмунуб терефнаан пашман хабрар гъюра.
Улихьна йигъари Табасаран райондин Жвулли гъулаъра аьхю ва пашман салам гъабхьну. Узуз ужуди таниш вуйи Муртазаеварин хизандиан СВО-йиъ иштирак шулайи жигьил, душмандин гюллдиан дукIну, гъулаз гъахну. Узу, дугъан багахьлуйириз дерин пашманвал мялум апIури, балин накьвдихъ ишурайи дадайиз, чйириз ва гъардшариз сабур, сагъ’вал ккун апIураза.
Мухтасар Рамазанович Муртазаев 1982-пи йисан Табасаран райондин Жвулли гъулаъ бабкан гъахьну. Дугъу гьадму гъулан кьялан мектеб ужудар аьгъювалар ади ккудубкIну. Къайд апIувал лазим вуки, Муртазаеварин хизандин вакилар мектебдиъ гьарган ужудар аьгъювалар гъадагъури урхрудар вуйи. Мектеб ккудубкIбан кьяляхъ, Мухтасар вуздик урхузра кучIвну, амма фициб-вуш себеб ади, дугъу урхувал дипну ва 2003-пи йисан Табасаран райондин военкоматдиан призывдиинди яракьлу кьувватарин жергйириз гъуллугъ апIуз гъушну. Армияйиъ айи вахтнара, Мухтасар Рамазановди чан хасиятнан ужударсдар терефар улупури, гьюлерин флотдиъ гъуллугъ апIури гъахьну. Хъасин контрактдиинди гъуллугъ апIури гъузну. Хъа гьюлериин гъуллугъра думукьан рягьятуб дар. Контрактдин вахт ккудубкIиган, Мухтасар Рамазанов жандин сагъламвал зяиф хьувализ лигну, багъри гъулаз хъадакну гъафнийи.
Гъулаъра жигьилари фу ляхин апIурухъа? Хизандин ляхнар тамам апIура кIури, маважиб саб терефнаанра гъюрдар. Жигьил инсандиз чан яшайишдин мадар апIуз мумкинваллазим ву. Гьамци Мухтасар Рамазанов, шагьрариз гъягъюри, тикилишчивалин ляхнариин машгъул духьну яшамиш шулайи.
–Уьлкейиъ бегьем дару мобилизация мялум гъапIган, гизафдариз повесткйир гъафнийи. Зяиф сагъламвал хъайивализ лигну, Мухтасарихьан дурушдира гъузуз шуйи. Амма думу чан хушиинди хусуси метлеб айи дявдин операцияйиъ иштирак хьуз гъушну. Гьарсар дадайиси, узура дугъаз: «Жан бай, яв жигьил жандин язухъ апIин, дурушди гъузузра шулвухьан», – кIури гъахьунза. Думу чаз гъапIу табшуругъ тамам дарапIди гъузуз шлур дайи, гьадмукьан ужуб, гъяни юкIв айир вуйи. Аьхиримжи ражари телефондиан Мухтасари узу ЦIийи йис улубкьурайи-валихъдира тебрик гъапIнийи. «Сагъ-саламатди кьяляхъ гъюрза, швушвра кадагъну, саб ужуб аьхю сумчирра апIидихьа, дада, сабдиканра фикир мапIан», – гъапнийи дугъу, кIури,ишура эскрин дада Мухлиса.
Мухтасар Рамазанов 6-пи октябриъ бегьем дару мобилизацияйин дахилнаъди Табасаран райондин военный комиссариатдиан Чечен Республикайиз гьаъну. Душваъ цIиб вахтна дявдин гьязурлуг’валар духну, 2022-пи йисан 24-пи октябриъ думу Донецкдин Халкьдин Республикайин аьтрафариина гьаънийи.
Гьелбетда, дявдиъ дархьи касдиз дидкан ктибтувал думукьан рягьят дар. Хъа вушра, Мухтасар Рамазановдихъди чан дада, халу ва гъардшар, гизаф даршра, телефондиан улхури гъахьну. Мухтасар Рамазанов 12 дагъустанлуйирикан ибарат вуйи разведка гъабхру дестейин командир дубхьнайи. «Ич метлеб нацистарин дестйир жин духьнайи йишвар аьгъю апIувал вуйич. Саб десте баяр кьюд-шубуд йигъазди разведкайиз гъягъюрча.Ич улихь дивнайи месэла тамам апIбан кьяляхъ, хъадакну гъюри шуйча. Учв командир вушра, Мухтасари чав хъадарди учу саб ражнукьан разведкайиз гьаундайи. Думу гьадмукьан ужуб юкIв айи кас вуйи. «Учвуз хулаъ бицIидар, хпар ккилигура, ичв жанар уьрхяй. Узухъ гьеле хизан хътарзухъ, разведкайиз узу гъягъидиза. Эгер учу кьюд-шубуд йигъандин арайиъ кьяляхъ дарфиш, учу агуз гъарахай ва лазим вуйиси рякъ-раж апIинай», – кIури шуйи Мухтасари», – дердну юкIв абцIну, ктибтура гъулаз майит хьади гъафидарихъди дуфнайи ТIивак гъул’ан вуйи Расимди.
Гьамци, ЦIийи йис къайд дапIну, сад йигълан разведкайиз гъубшу десте кьяляхъ гъафундар. Январин 3-пи йигъан дурар нацистарин гюллдин цIикк ккахъну.
Мухтасар Рамазанов аьхиримжи рякъюъ тIауз Чечен Республикайин военный частнаан дуфнайи дявдин гъуллугъчийи накьвдихъ чан улхбаъМухтасар Рамазанов «Кьягьялвалин орден» тувуз улупнайиваликан гъапнийи.
Ватан бадали жан туву жигьилар баркаллуди уьмриан гъушну, дурарин гьунар,игитвал гележегдин наслариз гьаргандиз нумуна вуди гъубзди.
