Февралин 5-пи йигъан Табасаран райондин администрацияйиъ аппаратдин совещание кIули гъубшну. Душваъ райондин глава Мягьямед Къурбановди Табасаран райондин улихь дийигънайи – штухъди тяминвалин, сагъламвалин тешкилатар тикмиш апIбан, рякъярин ва жара асас месэлйир гъитIирккну.

Райондин бязи гъулар штухъди тямин апIбан улихьгандин проект, пишекрарин ахтармишарин кьяляхъ, дигиш апIбанди гъахьну, фицики проект уьмриз кечирмиш апIбан бадали, Къужник гъулан багахь лазим кьадар шид хьтар. Гьамусяаьт Къяйтагъ райондиан мина шид зигуз мумкинвалар агура.

Багарихьди Ккувлигъ гъулаъ модульный ФАП тикмиш апIуз. Гьаддиз Мягьямед Къурбановди «Гуминский сельсовет» гъулан советдин главайиз ФАП-дин дарамат дивуз жилин участок жара апIбан табшуругъ тувну.

Совещаниейиъ аьхиримжи йисари тикмиш апIувал дебккнайи райполиклиникайин кьюбпи корпус ккудубкIбан ляхин гъабхурайиваликанра гъапну.

Гъюру йисан райондин машинар гъягъру рякъяр рас апIбанди ву. Асас вуди Хючна–Хив, Дербент–Хючна, Мамедгъала–Хючна рякъяриин ляхнар гъахиди. М. Къурбановди райондин вари рякъярин карта гьязур апIбан табшуругъра тувну. 300 км. райондин мяна айи рякъяр Табасаран райондин балансдиз гъиди. ВаритIан читин гьялнаъ айи рякъярин участокар рас апIуз райондин бюджетдиан дакьатар агувал планламиш апIура.

Райондин главайи багарихьди администрацияйин вари гъуллугъчйирин аттестация гъабхбан Положение гьязур апIувал табшурмиш дапIна. «Администрацияйин гьарсар гъуллугъчийи чахьан чав апIурайи ляхнин вазифйир тамам апIуз удукьрувал субут дапIну ккунду. ЦIийи гъуллугъчйир конкурсдин бинайииндитIан кьабул апIидар», – гъапну райондин кIулиъ айири.

Совещаниейиъ гьацира жара месэл-йирра гьял гъапIну.