Гьаму йигъари федеральный телеканалариан Дагъустандиъ цIа кабхънайи хул’ан бицIир ва дугъан дада адагъу Виталий Ивлевдин игитваликан ктибтури гъахьну. Хъа январин аьхиримжи йигъан Дагъустандиъ айи Урусатдин МЧС-дин управлениейин кIулиъ айирин заместитель Олег Колпиковди, Виталий Ивлевдиз чухсагъул мялум апIбан кагъаз туври, республикайиъ жара касарин дерднахьна вижнасузвал улулупру, чпин уьмрикан фикир дарапIди жарадариз кюмекназ гъюру инсанар айивалиинди чав дамагъ апIурайиваликан, Виталийдин дирбаш ляхин жигьилариз нумуна дубхьну ккуниваликан гъапнийи.
КIваин апIуз ккундучуз, январин 26-пи йигъан Мягьячгъала шагьрин Лаптиевдин ччвурнахъ хъайи кючейиъ гизаф мертебйирин хулариъ жюрбежюр подъездариъ газран давлениейин кьадар артухъ хьпан натижайиъ 10 квартирайик цIа кабхъну. Гьадму вахтна Виталий Ивлев саб хулан багхьантина гъягъюрайи. Дугъаз шубубпи мертебайиан дишагьлийин гьарйир гъеерхьну. Гьадмусяаьт думу, турбйирик ва унчIварик кеъри, шубубпи мертебайиз удучIвну. Сифте бицIир хабахъна гъадагъну, думу гьяятдиъ уч духьнайидарихьна исинди тувну, хъасин дишагьлира кумран ва цIин дустагъдиан азад гъапIну.
Думу йигъан цIийир кахьбан дюшюшариан 2 кас больницайиз гъурхну, вари 10 квартирайиз зарарар гъахьну, хъа, аьхю бахтнаанси, гъийихдар гъахьундар.
ЦIа кабхъбан дюшюшарикан улхури, къайд дарапIди гъибтуз шулдар, 2023-пи йис кубкIну гьеле саб вазтIан дубшнадар, амма гьаму вахтнан арайиъ уьлкейиъ цIа кабхъбан бедбахтвалариъ 36 бицIир гъийихну.
Урусатдин МЧС-дин пресс-гъуллугънаан туву мялуматариинди, асас вуди цIин бацаригъ гъяхьрайидар 3 йислан 5 йис’ина яшариъ айи бицIидар ву. Урусатдин МЧС-ди ватандашарикан бицIидар гьаммишан уларикк гъитуз, цIин хатIасузваликан кIваълан гьадрархуз, фициб дюшюшнаъра бицIидар ялгъузди хулаъ гъидритуз теклиф апIура. Килбтар, зажигалкйир, шамар бицIидар дурукьру йишварихь дивну ккунду. БицIидарихъди шлубкьан артухъ вахт адапIай ва дурариз цIин хатIалуваларикан ва цIа кабхъбан дюшюшариъ арайиз гъюрайи бедбахтваларикан кидибтай, – насигьят тувра МЧС-дин гъуллугъчйири.
«36 бицIир – му лап къурхулу цифра ву. Гьаму бицIидарикан шубубпи пай хулаъ ялгъузди гъитнайидар вуйи. Яшар бегьем духьну адру веледар ялгъузди хулаъ мигъитанай. Натижа бахтсузуб хьуз мумкин ву. МЧС-ди чан нубатнаъ бицIидарин хатIасузвал уьбхбаз, аргъаж шулайи наслин жвув хатIасузвалиинди гъахбан саягънан культура артмиш апIбаз асас фикир тувра. МЧС-дин гъуллугъчйири регионариъ гьаму темайиз тялукь серенжемар сикин дарди гъахура. Гьадму серенжемарин кюмекниинди гъубшу йисан, 2021-пи йисахь тевиган, цIин хатIалу дюшюшариъ кечмиш шулайи бицIидарин кьадар 20 процент цIиб апIуз мумкинвал гъабхьну», – гъапнийи Урусатдин МЧС-дин кIулиъ айи Александр Куренковди.
Думу гьякь ву. Мисалназ, гьаму йигъари Салехард шагьриъ гизаф мертебайин хуларик цIа кабхъбан дюшюшнаъ цIа ктIубшвру дестейин гъуллугъчйирихьан 6 кас, дурарикан 4 бицIир, вахтниинди цIигъян гъядягъюз гъабхьну. Дурарихьан кюмек дарди кьюбпи мертебайиъ абхъу кIару кумрягъян гъюдучIвуз шуладайи.
Улихьна йигъари Нижегородский областдиъра гизаф мертебайин хуларик цIа кабхъну. 10 кас цIин йисирар гъахьнийи, гьадму гьисабнаан 4 бицIирра. Саб квартирайиъ цIа кабхьруган анжагъ кьюр бицIиртIан адайи. Хул’ан удучIвуз даршулайи бицIидар леъфигъян гъидиржну айвандихъна удучIвуру ва дурари кючейиъ айидариз кюмекназ дих апIуру. ЦIа ктIубшвру гъуллугънан дестейиз бицIидар айвандин мурччваъ гучIбаан ишури дихъуру. Дурар больницайиз гъурхну.
Ухьу гьамцдар дюшюшарихьан Аллагьди ярхла апIри. Хъа вушра, ихтиятвал уьбхюз магьарханай.
