1990-пи йисари Советарин Союз гъадабгъиган, коммунистарин партияйи уьлкейин уьмриъ уйнамиш апIурайи рольра, дидин кьувватра цIиб гъахьнийи, ва саб-швнуб цIийи партияра арайиз гъафнийи.
Уьлкейиъ ва партияйин жергйириъ гъягъюрайи читин гьядисйириз дилигди, компартияйин Табасаран райондиъ айи комитетди чан жергйириз партияйихъан, гьюкуматдихъан ва халкьдихъан юкIв убгурайи коммунистар уч гъапIнийи. Дурарин ччвурар ктухуз ккундузуз: Аьбдуриза Аьлиев, Мюгьюдин Ильдарханов, Камил Гьяжиев, Тажудин Мягьрамов, Эвсередин Аьдилов ва жарадар. Му касари, фтизкIа дилигди, райондиъ партияйин тешкилат гъюбхну ва дидин ляхин хайлин жанлу гъапIну.
Гизаф йисари райондиъ коммунистарин партияйин тешкилатдин кIулиъ Эвсеретдин Аьдилов гъахьну. Дугъаз райондиъ заан гьюрмат айи, республикайиъра думу ужуб гьисабнаъ айи кас вуйи. Думу вахтна райондиъ партияйин тешкилатдин дахилнаъ 200-тIан артухъ членар ва кандидатар айи.
Райондин компартияйин кIулиъ Низами Къурбанов дийигъхъанмина тешкилатдин ляхин кьяляхъ йивуз хъюгъну. Компартияйин ляхнихьан инсанар ярхла гъахьнийи, апIурайи ляхин гъюлягъ гъипнийи. Тешкилатдин вакилар му ляхникан затра рази дайи, ва дурар кьюд йисандин арайиъ саб-швнубан гьам Низами Къурбановдихьна, гьамсан республикайин КПРФ-дин рескомдихьна илтIикIнийи, амма саб жюрейинра дигиш’валар гъахьундайи.
Аьхирки, 2022-пи йисан августдин вазлиъ, Табасаран райондин коммунистарин теклифниинди, райондиз РД-йин КПРФ-дин рескомдин сарпи секретарь Самир Аьбдулхаликьов ва КПРФ-дин рескомдин идеологияйин отделин заведующий Казбек Къурбанов гъафнийи.
20-пи августдиъ Табасаран райондин КПРФ-дин тешкилатдин совещание кIули гъубшнийи. Дина бюройин членариз, партияйин тешкилатдин секретарариз, КПРФ-дин муганайиздин активдиз, ва гьацира Табасаран райондин глава Мягьямед Къурбановдиз теклиф гъапIнийи. Совещаниейиъ вахтназ вуди Табасаран райондин компартияйин сарпи секретарин вазифйир тамам апIурайи Гьяжиэскер Гьяжиевди кьюд йисандин арайиъ гъапIу ляхнин натижйирикан ктибтнийи
16-пи сентябриъ партконференцияйи цIийи делегатар – 27 кас ва бюройин юкьур член ктагънийи, хъа райондин компартияйин комитетдин сарпи секретарди, вари делегатари сесер тувну, Талиб МутIалимов тяйин гъапIнийи.
Талиб Манафович МутIалимов 1951-пи йисан 18-пи майдиъ ТIивак гъулаъ бабкан гъахьну. 1978-пи йисан дугъу Дагъустан Республикайин гъулан мяишатдин институтдин агрономвалин факультет уьру дипломдиинди ккудубкIну. 1978-2011-пи йисари жюрбежюр гъуллугъариъ гъилихну: компартияйин райкомдин инструкторди, «Сабпи май» чяхрар гьясил апIру совхоздин директорди, райондин гъулан мяишатдин управлениейин начальникди, жиларин ва мутмйирин отделин начальникди ва жара ляхнариъ. 2017-2022-пи йисари Табасаран райондин яшлуйирин советдин председателди гъахьну. 2022-пи йисан сентябрин вазлихъанмина Табасаран райондин компартияйин сарпи секретарди лихура, 1980-пи йисхъан мина КПСС-дин членра ву.
«2022-пи йисан 4-пи ноябриъ Табасаран райондин КПРФ-дин муниципальный отделениейин бюройин сабпи заседание кIули гъубшну ва душваъ райондин тешкилатдик кайи коммунистарин кьадар аьгъю апIбан, цIийи членар кьабул апIбан ва СССР-ин 100 йис хьпаз тялукь серенжем кIули гъабхбан, бюройин членарин арайиъ чпин вазифйир пай апIбан ва хайлин жара месэлйир гьял гъапIну.
Бюройин гьарсар членди чпин аьтрафариин али партияйин тешкилатарихъди ляхин дапIну ккунду, КПРФ-дин членвализ кандидатар жалб апIбан бадали, жямяаьтлугъ ляхнар, жюрбежюр серенжемар гъахури ккунду.
2022-пи йисан 26-пи декабриъ бюройин кьюбпи заседание гъабхьну. Душваъ 2023-пи йисан 30-пи мартдиъ Табасаран райондин КПРФ-дин пленум гъабхбан гьякьнаан къарар адабгъну.
Табасаран райондин коммунистарин партияйин комитетдин улихь дийигънайи месэлйирикан саб – халкьарин арайиъ мясляаьт уьбхбан бадали, райондиъ гъягъру дюз дару, нягьякь ляхнар апIрударихъди женг гъабхувал ву.
Райондиъ айи коммунистарин улихь цIийи месэлйирра дивна. 2023-пи йисан, улубкьнайи йисаз улупнайи пландиз асас вуди, лап дикъатлуди ляхин дапIну ккунду.
Райондиъ агьалйирин уьмур ужу, райондин экономика за апIбан бадали, учу Табасаран райондин администрацияйихъди сатIиди учхьан шлу зегьметра зигидича.
Жигьиларихъди насигьят тувбан ляхин, ва гьацира Украинайиъ кIули гъябгъюрайи хусуси метлеб айи дявдин операцияйиъ иштирак шулайидариз учхьан шлу кюмек апIбан ляхинра гъабхидича», – гъапнийи Табасаран райондин компартияйин сарпи секретарь Талиб МутIалимовди.
