1-пи февралиъ Табасаран райондиз Дагъустан Республикайин образованиейин ва илимдин министр Ягь’я Бучаев гъафну.

 

 

Образованиейин ва илимдин ми-нистри чав къайд гъапIганси, думу райондиз гъюбан метлеб – Табасаран райондин образованиейин гъурулушдин гьякьлу аьгьвалатнахъди таниш хьувал ву. Чав улихь дивнайи месэла тамам апIбан бадали, Ягь’я Бучаев райондин аьтрафариин лихурайи вари 58 мектебдиз гъягъбанди ву.

Республикайин образованиейин ва илимдин министрихъди мектебар ахтармиш апIбан ляхниъ Табасаран райондин глава Мягьямед Къурбанов, райондин администрацияйин главайин заместитель Заур Мусаев, райондин образованиейин управлениейин кIулиъ айи Аьбдусалам Гьясанов иштирак шула.

Табасаран райондин образованиейин идарйирин кьадар аьхюб вуйивал ва райондин гъуларра аьхю аьтрафариин ерлешмиш духьнайивал гьисабназ гъадагъну, мектебарин ахтармишар 4 йигъан давам хьиди. Садпи йигъан Ягь’я Бучаев Дарвгъарин 1-пи ва 2-пи нумрайин кьялан мектебариз, Зил’арин, Ярсарин, ТIаттларин, ГьепIларин, Ягъдигъарин 1-пи ва 2-пи нумрайин, Хючнаарин 2-пи нумрайин, Хюрккарин, Хянгъярин, Пилгъарин, Улзарин, Къужникарин, Шил’арин кьялан мектебариз гъушну.

Учв гъушу гьарсаб мектебдиъ Ягь’я Бучаев ляхин апIурайи мялимариз ва урхурайи баяр-шубариз яратмиш дапIнайи шартIарихъди, китабарин тяминвалихъди таниш гъахьну, материаларинна техникайин бина мюгькам апIбакан, мялимариз лайикьлу маважибар тувбакан, уьлкейин ва республикайин образованиейин циркилин артмиш’валин гележегдикан мялимарин суалариз жавабар тувну.

Хючнаарин 2-пи нумрайин кьялан мектебдиъ республикайин образованиейин ва илимдин министр урхурайидари жвуван хушниинди Ватандин маракьар уьрхюз хусуси метлеб айи дявдин операцияйиз гъушу Юсуф Аьлимягьямедовдихъди кIули гъабхурайи гюрюшдиъ иштирак гъахьну. Гюрюшдин кьяляхъ Я.Бучаевди баяр-шубарин уьмуми ва хусуси образованиейин артмиш’валин рякъярикан, гележегдиъ зегьметнан рынокдиъ тIалаблу кеспарикан вуйи ва хайлин жара суалариз жавабар тувну.