Гъябгъюрайи гьяфтайин итни йигъан Хив райондин кьялан библиотекайиъ, Афгъанистандиан советарин кьушмар адаъну 34 йис хьпаз тялукь вуди, шахматар уйнамиш апIбан турнир кIули гъубшну.

 

 

Му серенжем «Хив район» муниципальный образованиейин культурайин, спортдин, жигьиларин политикайин ва туризмдин отделин жягьтлувалиинди тешкил гъапIуб вуйи.
Думу цирклиз регьбервал туврайи Казбек Къазиевди къайд апIурайиганси, талитар олимпиадайин къайдайиинди жиларин арайиъ кIули гъухнийи. Серенжем тикмиш апIбан асас метлеб – райондин жигьиларин ва аргъаж шулайи наслин арайиъ шахматарин спорт артмиш, шахматар уйнамиш апIрударин устадвалин дережа за ва ужударстар спортсменар ашкар апIувал вуйи.

Шахматарин талитарин натижайиъ сабпи йишваз Хив гъул’ан вуйи Сейфулагь Селимханов лайикьлу гъахьну. Кьюбпи йишв Заан Яракк гъулан ватанагьли Аьбдулнасир Сефикъурбановди гъадабгъну. Хъа шубубпи йишван сагьиб Чювекк гъул’ан вуйи Гьяжирамазан Мурадханов гъахьну.

Шахматар – му инсаниятди кюгьне деврарианмина уйнамиш апIурайи тамаши ву. Думу тамашийи, инсандин гьевес ва гевюл за апIбахъди сабси, урхувалиъ, иллагьки технический цирклиан аьгъювалар ва ляхниъ хъуркьувалар гъадагъбаъ, ужудар мумкинваларихьна рякъ ккивуз ва фикир артмиш апIуз гужалди тясир апIуру.