Хив райондин яркврарин мяишатди 17125 гектарин жил дибисна. Яркврар райондин 8 мешебегийи гьар йигъан гюзчиваликк уьбхюра.
Хив райондин яркврарин мяишатдин кIулиъ айи Загьидин Батмановди ич сюгьбатнаъ къайд гъапIганси, гъубшу 2022-пи йисан Хив райондин яркврариъ цIа кабхъувалин дюшюшар гъахьундар. Гьаму йигъари дурарин идарайи Урусатдин Дагъустандиъ айи МЧС-дин вакиларихъди сатIиди 2023-пи йисан Хив райондин яркврариъ цIа кабхъувалин хъатIалу дюшюшарихьан уьрхбан серенжемар кIули гъурхну.
«Яркврариъ цIа кабхъбан хатIасузвал тямин апIувал апрелин вазлиланмина башламиш апIура. Учу Хив райондин агьалйирихъди, мектебариъ урхурайидарихъди цIин хатIалуваликан кми-кмиди сюгьбатар гъахури шулча. Гьяйифки, райондиъ ярквран мяишатдин асккан гьисаб 15-кьан инспектор ади ккундийи, фицики 8 инспекториз вари аьтрафариз лигуз гизаф гъагъиди алабхъура. Инспекторин вазифйирик ярквран чаз улупнайи участокдиъ гюзчивал гъабхувал, хатIалу дюшюшарикан вахтниинди хабар дебккувал, агьалйирихъди ярквран важиблуваликан ва думу уьбхбан хайирнакан сюгьбатар гъахувал кахьра. Хив райондин яркврарин мяишатди саки 18 агъзурихьна гектарин йишв дибисна. Яна Табасаран райондиан ккебгъну, Агъул райондин ва СтIал Сулейман районарин сяргьятарихънакьан аьхю йишв бисура. Ярквран инспекторар гьар йигъан чпин участокариъ 10-15 километр илдицури ккунду. Дурариз, гьяйифки, транспорт адар. Улихьди дурариз гьяйвнар тувуйи, укI убшвру йишвар жара апIуйи. Гьамус вахтар гьюдюхну.
Яркур ухьу халкьдиз, агьалйирин игьтияжар гьуркIуз уьбхюрахьа. Яркур ихь гьавайин марццишин уьбхюрайи девлет ву. Гьяйифки, ихь инсанари яркврар чиркин апIбан дюшюшарра кми-кмиди алахьуру. ЦIиб улихьнаси Мягьячгъалайиъ совещание гъабхьнийи. Гьадушваъ гьаму месэлара гъитIибкIну. Республикайин яркврариъ наанди гъилигиш, урслар дахьна. Дурар ихь инсанари арайиз хурайидар ву.
Хъа дурар марцц апIру кас адар. Хив райондин яркврариъ урсларин ва хъархъсарин месэла дици писуб дар. Хъа, вушра, ярквраз рягьятвал гъадабгъуз гъафи инсанари чпин кьяляхъди зирзибил марцц дапIну ккунду. Асас вуди цIа кабхъувалин дюшюшар хъархъсар дахьнайи йишв’ин арайиз гъюру. Хив райондиъ ГъуштIил, АрхъитI, Цнал гъуларин терефназди вуйи яркврар цIа кабхъуз артухъси хатIа айидар ву», – гъапнийи Загьидин Батмановди.
