Урусатдин Яракьлу кьувватари Украинайиъ хусуси метлеб айи дявдин операция гъабхурайи вахтна, табасаран халкьдин 3 вакил: Эседуллагь Абачев, Руслан Къурбанов ва Исрафил Мягьямедов «Урусатдин Игит» ччвур тувбиинди лишанлу дапIна.
Гьяйифки, Исрафил Мягьямедовдиз «Урусатдин Игит» ччвур йикIбалан кьяляхъ тувну.
Дагъ. Огни шагьрин глава Жалалудин Аьлирзаевдин табшуругъниинди, Исрафил Мягьямедовдин гьюрмат уьбхбан бадали, гьамусяаьт шагьриъ хайлин ляхнар кIули гъахура. Игитри урхури гъахьи 4-пи нумрайин мектебдиз Исрафил Мягьямедовдин ччвур тувну, мектебдиъ дугъан уьмрикан ва игитвалин гьядисйирикан ктибтурай, цалик кебхру тахта ва гьюрматнан мурччв дюзмиш гъапIну. Хъа 13-пи февралиъ Дагъ. Огни шагьрин культурайин хулаъ ватандин маракьар бадали чан жан фида гъапIу Исрафил Мягьямедовдикан сабпи ражну вуди «Корнет» кIуру документальный фильм улупну. Дидиз лигуз шагьрин администрацияйин гъуллугъчйир, мектебариъ урхурайи баяр-шубар, мялимар, Исрафилихъди саб классдиъ урхури гъахьидар ва багахьлуйир гъафнийи. Кинофильм гизаф ужуб, тербия тувбан мяна айиб, жигьилариз нумунади улупуз шлуб гъабхьну. Дидиъ Исрафилин уьмрин хъуркьуваларикан ва дугъан хизандикан, дугъу, Ватан бадали, фици жвуван жан фида гъапIнуш, ктибтура.
Урусатдин Игит Исрафил Мягьямедовдикан документальный фильм улупуз жягьтлувал улупур, Дагъ. Огни шагьрин глава Жалалудин Аьлирзаев ву.
Серенжемдиз Исрафил урхури гъахьи классдин руководитель Гюльнисе Шихягьмедовара дуфнайи.
«Исрафил учухьна мектебдиз гъюру вахтна, узу 7 классдин руководитель вуйза. Думура кади, классдиъ 25 баяр-шубар айи. Дуфну сабпи йигъланмина Исрафили классдиъ урхурайи баяр-шубарихъди дуствал апIуз хъюгънийи. Гизаф ужур, тербия хъайи, аьхюр-бицIир аьгъю бай вуйи. Саспи вахтари, ккунийкIана Исрафилиз швушвди тувру риш хъади узухъ, фикир гъюйиз. Ватанпервер, Урусатдин Игит Исрафил Мягьямедов гъийин жигьил наслиз намуслувалин, инсанвалин, багъри халкь ва юрд ккунивалин нумуна ву.
Саб ражари вари классдиз, ихь ватандикан сочинение бикIай кIури, хулаз табшуругъ тувнийза. Ва гъюру дарсназ баяр-шубари ватандикан дидикIну гъахи сочиненйирикан, Исрафили гъибикIуб башкъа мяна айиб вуди гъабхьну. Дидиъ дугъу, йиз Ватан бадали жанра гьяйиф дариз, дибикIнайи, – ишури ктибтнийи Гюльнисе Черкесовнайи. – Йиз думу класс 1999-пи йисан мектебдиккан ккудубчIвуб вуйиз. Вари гизаф албагу, ужудар баяр-шубар вуйи. Дурари мектеб ккудубкIхъанмина 22 йис гъубшну, гъира дурар узухъди сатIи шули, телефондиъ группа тешкил дапIну, аьлакьа имийич. Гьар йисан отпускдиз гъафиган, вари уч апIрур Исрафил вуйи. Вари ккунир, шаду, дирбаш, игит бай Исрафил ихь уьмриан мукьан ухди гъягъюр кIури, фикир дайиз. Узуз му хабар гъеебхьиган, йиз кIваан гьациб гьарай утIубччвнийизки! Узуз гьамци гъагъиди вуйиган, дугъан дадайи фици аьх апIурайкIан кIури, фикир шулиз. Гъит дугъаз тербия туву дадайиз Аллагьди сабур туври», – давам гъапIнийи дугъу.
Исрафил Мягьямедовдикан адабгънайи фильмдикан дугъахъди саб классдиъ урхури гъахьи варитIан ижми дустар вуйи Вадим Мягьямедовдина Амир Шагьбановди чпин фикрар ачухъ гъапIнийи.
«Учуз Исрафил ич гъардашси ккунир вуйчуз. Думу лап ужур инсан вуйи. Дугъан гъиллигъар гъи дугъаз туву «Урусатдин Игит» ччвурназ хас вуйидар гъахьну. Учу сатIиди саб фицики серенжем тешкил апIру вахтна, думу гьаммишан улихь гьучIврур вуйи. Чав буйругъ туврайи эскрариина гъюрайи хабарсуз гюллдихьан дурар уьрхбан бадали, дугъу чан жан фида гъапIну. Думу гъакIну дупну, гьелелиг гьич фикризкьан гъюрадарич. Исрафилсир юлдаш ич уьмриъ хьувалиин учу гизаф рази вуча. Игитар йихурдар, дурар гьаммишан ихь фикриъ гъузру. Исрафилра даимлугъ ич юкIвариъ хьиди», – гъапнийи Игитрин дустари.
