ЦIиб улихьнаси учу газатдин машариъ Хив райондиъ варитIан ужуди шиир урхрударин арайиъ конкурс гъабхьиваликан ва душваъ Хив гъулан М. Шамхаловдин ччвурнахъ хъайи кьялан мектебдин 11-пи классдиъ урхурайи Амина Ремихановайи сабпи йишв гъадабгъуваликан мялумат тувнийча. Магьа Бабан чIаларин йигъан улихь, 20-пи февралиъ, думу конкурсдин республикайин дережайин натижйирра гъивну. Республикайиъра ихь риш сабпи йишваз лайикьлу гъахьну.
Амина конкурсдихьна гьязур гъапIу Хив гъулан кьялан мектебдиъ бабан чIалар киврайи мялим Гюлузар Беговайи мялум гъапIганси, республикайин дережайин конкурс онлайн къайдайиинди кIули гъубхнийи.
«Учу мектебдин «Точка роста» кабинетдиъ онлайн къайдайиинди конкурсдихьна гьязур гъахьнийча. Техникайи сифте цIиб манигъ’валар гъапIнийи. Аьхирки, ич бахтнаанси, онлайн- къайда либхуз хъюбгъну. Гьаму ражарира Аминайи шиир лап успагьиди гъурхнийи. Жюрийиз лап кьабул гъабхьну. Дурари ич мектебдин директор Физули Аьбдулязизовдиз чухсагъул мялум гъапIну. Думура гьадму вахтна кабинетдиъ айи. Конкурсдиъ иштирак хьуз ич нубат гъафиган, жюрийин вакилари Эльмира Аьшурбеговайин «Лизи луфракан кьиса» поэма ярхиб вушра, чпиз дидихъ хъпехъуз ккуниваликан гъапнийи. Хъа учу регламентдиъ улупнайи вахт цIиб вуйиган, жикъи саб пай гьязур дапIнайча», – къайд гъапIнийи Гюлузар Беговайи.
Февралин 21-пи йигъан Амина Ремиханова Хив райондин культурайин хулаъ бабан чIалариз бахш вуди гъабхурайи конференцияйиъ Хив райондин культурайин отделин терефнаан Гьюрматнан грамота тувбииндира лишанлу гъапIну.
