Урусатдин Федерацияйин Президент Владимир Путинди ихь уьлкейин яракьлу кьувватарин заан офицерариз дявдин гъуллугъчйирин цIийи ччвурар тувбан гьякьнаан Указдиин къул гъизигну.
Думу Указдиъ улупнайи гъуллугъчйирин сиягьнаъ хусуси метлеб айи дявдин операцияйиъ иштирак шулайи Урусатдин Игитарин, Дагъустандиан вуйи кьюр генералин ччвурарра айи.
Ригъ гьудубчIвру терефнан дявдин округдин команду-ющий Рустам Мурадовдиз генерал-полковникдин, хъа ЛНР-ин Халкьдин милицияйин 2-пи армияйин корпусдин командующий Эседуллагь Абачевдиз генерал-лейтенантдин ччвурар тувну.
Уьлкейин варитIан заан дережайиъ гьамци лишанлу апIували ихь машгьур генераларин хъуркьуваларикан ва дурариин али хъугъ’валикан субут апIура. Хъа дурар кьюридра табасаранар вуйивали ухьук хъана артухъ дамагъ капIра.
Гьюрматлу Рустам Уьсманович ва Эседуллагь Аьбдулмуъминович, вари дагъустанлуйир, иллагьки табасаранар, ичв хъуркьувалариин гьяйран духьна. «Табасарандин нурар» газатдин коллективди, ичв гъуллугънан цIийи ччвурар мубарак апIури, учвуз ляхниъ хъана заан хъуркьувалар ва Гъалибвалра хьади хулаз кьяляхъ гъювал ккун апIурача.
