21-пи февралиъ РФ-дин Президент Владимир Путин Послание хьади Федеральный Собраниейихьна илтIикIну. Украинайиъ хусуси метлеб айи дявдин операция ккебгъхъанмина, думу уьлкейин кIулиъ айирин сабпи илтIикIувал ву. Къайд апIувал лазим вуки, Президентдин удучIвну улхбан асас пай СВО-йин темайиз бахш дапIнайи.

 

 

«Гьаму Послание хьади гъагъи вахтна илтIикIураза. Сад йис улихьна, ихь инсанар неонацистарин зулмиккан уьрхбан бадали, хусуси метлеб айи дявдин операция ккебгъбан гьякьнаан къарар адабгънийхьа. Гьарсар касдин гъюнариин аьхю жавабдарвал алабхъна… Ухьу яваш-явашди ихь улихь дийигънайи месэлйир гьял апIидихьа», – къайд гъапIну Владимир Путинди чан улхбан эвелиъ.

Урусатдин Президентди Ригъ алабхъру терефнан уьлкйирин политикари гъабхурайи ляхникан, дурари улихьдира, гьамусра апIурайи кучIларикан гъапну. «Думу уьлк-йири Югославияйиина, Иракдиина, Ливияйиина, Сирияйиина фициб мусибат гъабхну, дурарихьан думу аьйиб гизаф йисариланра марцц апIуз даршул. Дурариз намус, аькьюл, хъугъ’вал кIуру гафарин мяна аьгъдар. Дурар вари дюн’яйиин шириш алабтIури вердиш духьна. Дяви гьадрари ккебгъуб ву. Хъа ухьу, думу дяви дебккбан бадали, кьувват ишлетмиш апIурахьа. Ухьу инсанарин уьмур, ихь багъри хал уьбхюрахьа. Ригъ алабхъру терефнан уьлкйири Киев яракьдихъди тямин апIуз 150 миллиард манаттIан артухъ харжар гъапIну, хъа аьжузвал кайи уьлкйириз кюмек вуди 60 миллиард манаттIан тувундар, – гъапну Владимир Путинди ва давам гъапIну, – 2001-пи йисхъан мина США-йин тешкиллувалиинди гъуху дявйириъ 900 агъзуркьан инсанар гъийихну, 38 миллионтIан артухъ халкьар чпи яшамиш шулайи йишвариан жара йишвариз гьергну гъушну. Гьамус США-йиз чпи гъапIу писвалар гьархуз гъитуз ккунди а, хъа думу гьархруб дар».

РФ-дин Президентди къайд гъапIганси, гъубшу аьсрин 30-пи йисари Ригъ алабхъру терефнан уьлкйири Германияйиъ нацистар гьюкмихьна гъахну. Гъи Украинайиъ гьациб аьгьвалат арайиз дуфна. Дурариз, дяви гъабхури гъахьихъанмина, Урусатдихъди шли женг зигурашра, тафавутлувал адар. «Ригъ алабхъру терефнан уьлкйири Украина фукьан ярхлаз йивру яракьарихъди тямин гъапIиш, дурар ихь сяргьятарихьан гьадмукьан ярхлаз утIурккуз мажбур хьидихьа.

Думу уьлкйири, чпихьан дявдин чюлиъ Урусатдиин гъалиб хьуз даршлуваликан аьгъяди, чIуру мялуматарин алжагъувалар гьяракатнаъ ирчра.

Жигьил наслин фикир илтIибкIуз рягьят вуйивалин гъавриъ ади, чпин футнакарвалин ляхнар жигьиларин кIулариъ тIаъра».

Владимир Путинди бицIидарин арайиъ ЛГБТ-йин къайдйир тарагъувал тянкьид гъапIну. Дугъу гъапиганси, ухьу ихь веледар чIур хьувалихьан дюрхну ккунду.
Уьлкейин кIулиъ айири хусуси метлеб айи дявдин операцияйин тереф уьбхюрайидариз, женгариъ кьягьялвал улупурайи Урусатдин халкьдиз – яракьлу кьувватарин вари кьушмариз, дурарин хизанариз, медицинайин гъуллугъчйириз, инженерариз, тикилишчйириз, уьлкейин ипIру-убхърубдин хатIасузвал тямин апIурайи гъулан мяишатдин зегьметкешариз, азад гъапIу аьтрафариин лихурайи мялимариз, волонтерариз, женгар гъягъюрайи йишвариъ эскрариз концертар улупурайи артистариз, рягьимлувалин кюмек туврайи тешкилатариз, дилаварчйириз чухсагъул мялум гъапIну. Нацистарин хилариан гъийиху дявдин гъуллугъчйирин, ислягь ватандашарин гьюрмат уьбхюри, залиъ айидар саб дакьикьайиъ ккебехъну дийигъну.

Владимир Путинди СВО-йиъ гъийиху эскрарин хизанариз кюмек тувру гьюкуматдин фонд тешкил апIбан теклиф дивнийи. Дугъу мобилизацияйин дахилнаъди СВО-йиъ иштирак шулайи ватандашариз, дявдин гъуллугъчйириз гьацI йисандин арайиъ саб ражари кьюб гьяфтайин отпуск тувувалин къайда кьуватнаъ ипувал табшурмиш гъапIнийи.
Уьлкейин Президентди къайд гъапIганси, Урусат экономикайин артмиш’валин цIийи дережайиз удубчIвура, гизаф цирклариъ улихь гъягъюз хайлин мумкинвалар духьна. Урусатди Китайдихъди, Индияйихъди, Ирандихъди, Азияйин жара уьлкйирихъди аьлакьйир яркьу апIиди.

В. Путинди агьалйириз пулсузди газ зигбан месэла давам апIбаканра гъапну. 2023-пи йисан думу ляхин яшайишдин мяна айи дараматариъра кIули гъабхиди.
Гьацира дугъу, Сибирь гьяракатниинди артмиш апIбан бадали, Транссиб ва БАМ кьувватлу апIбан теклиф дивну.

В. Путинди Уголовный кодексдин экономикайин пайнаъ дигиш’валар тIаъбан важиблуваликан гъапну. Дугъу правительствойикан, парламентдикан ва къанун уьбхру органарикан экономикайин цирклиъ тахсиркарвалар терг апIувал ккун гъапну. Уьлкейин кIулиъ айири Урусатдин бизнесменарикан ва девлетлу касарикан ригъ алабхъру терефнан уьлкйирин улихь ужуз хьуз гъудрузувал, ихь уьлкейихьинди машди илтIикIувал ккун гъапIну.

Сечкйирин гьякьнаан улхури, Владимир Путинди уьлкейиъ вари жюрейин сечкйир къанундиз асас вуди ва чан вахтниинди гъягъруваликан гъапну.
Уьлкейин Президентди чан Посланиейиъ Донбассдин ва Луганскдин агьалйириз аьхю йишв жара гъапIну, дурарин дирбаш’вализ чухсагъул мялум гъапIну, регионарин артмиш’вализ вари жюрейин кюмек апIуз гаф тувну.

РФ-диъ жигьил аьлимарин ва хусуси пишекарвалин образованиейин цирклин тереф уьбхиди. Багарихьди гъюру 5 йисандин арайиъ электроникайин, промышленностдин, гъулан мяишатдин, тикилишчивалин, транспортдин цирклариз рабочий кесп кайи 1 миллион пишекрар гьязур дапIну ккунду. Заан образование тувбаъра дигиш’валар хьиди. Урусат образованиейин болонский гъурулушдихьан ярхла шула. Посланиейиъ мялимвалин пишейин ад за апIувал чарасуз лазим вуйиваликанра гъапнийи.
Инфляцияйин улихь гъягъру гьяракатниинди МРОТ-дин кьадар артухъ апIувалра давам шула. 2024-пи йисан садпи январихъанмина МРОТ 19 242 манат хьибди.
Аьгъювалар гъадагъбаз гъапIу харжарикан ктабгъурайи социальный налог (кьяляхъ тувру пул) 50 агъзурилан 100 агъзуриина за апIиди.

Владимир Путин чан Посланиейиъ хъана Урусатдин ва НАТО-йин аьлакьйир гьял апIбахъна хътакнийи. Дугъу къайд гъапIганси, дюн’яйиъ уьлкйирин аьлакьйир чIур гъахьну ва дидин тахсиркар США ву. Гьаддиз Урусат Стратегияйин алжагъувалин яракьарин йикьрариъ чан иштирак’валра дебккра. «Эгер США-йи сабпибди ядеиыйн яракь ишлетмиш гъапIиш, Урусатдин оборонайин министерствойи ва Росатомди Урусатдин ядерный яракь ахтармиш апIуз гьязурвал улупну ккунду», – гъапнийи В.Путинди.
Урусатдин Президентдин 1 сяаьтна 45 дакьикьайиъ давам гъабхьи Послание, Урусат гьякь ву, кIуру гафариинди ккудубкIну.