Аьхиримжи йисари Мягьячгъалайин аэропортдиз гъюрайи-гъягъюрайи инсанарин, гьадму гьисабнаан туристаринра, кьадар артухъ дубхьна. Дина гъафи-гъушдарин гафариинди, жара шагьрарин аэропортдиъ айи шартIарихь тевиган, Мягьячгъалайин аэропортдиъ инсанариз зат гъулайвалар адар. Гьадрарикан сабпиб – инсанариз аэропортдиз гъябгъру жямяаьтлугъ автобус адрувал ву, дина таксийиъдитIан гъягъюз шулдар. Хъа йигъандин вахтна таксийин кьимат, асккан гьисаб 500 манат ву.

 

 

28-пи февралиъ Мягьячгъалайиъ кIули гъубшу РД-йин Халкьдин Собраниейин сессияйиъ Аьбдулмуслим Аьдулмуслимов удучIвну улхбан кьяляхъ, дугъан адресназ Халкьдин Собраниейин депутатарин терефнаан 10-кьан суал гъахьнийи. Гьадрарин арайиъ Мягьячгъалайин аэропортдиз жямяаьтлугъ транспорт адрувалин месэла депутат Шамил Уьмаровди гъитIибккнийи. Дугъу РД-йин Правительствойин председателихьан, гьадму месэла гьял апIбан бадали, фицдар уьлчмйир кьабул апIураш, фила думу месэла гьял шулуш, гьерхнийи.

«РД-йин транспортдин министерствойи Мягьячгъала шагьриан кьюб маршрутдиъди – Р.Гьямзатовдин ччвурнахъ хъайи кюче – «Мягьячгъала» аэропорт ва Кьибла терефнаъ айи автостанция – «Мягьячгъала» – жямяаьтлугъ транспорт деебтбан гьякьнаан конкурс мялум дапIна.

Мидланра савайи, РД-йин транспортдин министерствойи пассажирар гъахувал тешкил апIру тешкилатдиз субсидйир тувбанди ву. Тешкилатарихьан аьрзйириз ккилигура», – жаваб тувну премьери.