Ватандин Аьхю дявдин вахтари табасаран дишагьлийири фронтдиъ айи эскрариз фици мани жакетар ва атIнар урхури хътаури гъахьнуш, дурари гьамусра думу ляхин давам апIури, Украинайин аьтрафариин гъябгъюрайи хусуси метлеб айи дявдин операцияйиъ иштирак шулайи ихь эскрариз хътаура.

 

«Табасарандин нурар» газатдин 4-пи нумрайиъ, хусуси метлеб айи дявдин операцияйиъ иштирак шулайи ихь баяриз атIнар урхуз кIури, гъулариъ айи кейвани дишагьлийир мурсларихъди тямин гъапIу Бухьнагъан вуйи Сарият Мягьямедовайикан «Эскрариз Табасарандиан мани атIнар» кIуру макьала чап гъапIнийча. Хъа гъи гьадму мурсларикан атIнар урхурайи Жвулли гъулан агьали Шекер Гюлмягьямедовайикан ктибтураза.

Шекер Гюлмягьямедова чан уьмриъ гьаммишан хиларихьди ляхин апIури вердиш гъахьи дишагьли ву. 25 йисандин арайиъ дугъу багъри гъулаъ кьасабарвалин ляхинра гъапIну. Фуну вахтна вушра гъулан жямяаьтдин шадвалин ва пашманвалин серенжемариъ думу гьаммишан кIакIнаъ айир ву. Чан 13 велед эвленмиш дапIну, гъи рягьятвал гъадабгъурайи дагълу дишагьлийихьан, ихь эскрари, жвуван Ватан бадали, ахъюшин аьх апIури, дявдин операцияйиъ иштирак шулайивал кIваин алди, гъирагъдиъ гъузуз гъабхьундар. АтIнар урхуз инсанарихьна мурслар туврайибдикан мялум гъабхьибси, чахьнара тувуб ккун дапIну, дугъу дишлади хьайин мурсларикан мани атIнар урхуз хъюгъну.
«Узухьна йиз шуру Тамарайи мурслар хьади гъафнийи. 3 ражари атIнар урхури, хътаури гъахьунза. Гьит йиз хиларилан тина гъапIу ляхин гьялал ибшри чпиз. Гьарсаб гъудгнихъ ислягьвал ккун апIури, вахтниинди дяви ккудубкIну баяр хулаз гъюбан бадали, дюъйир апIураза.

Йиз аьхюну байра военный вуйиз. Урусатдинна Китайдин арайиъ айи сяргьятар уьрхюри, дугъан 22 йис ву. Сар риш машиндин авария дубхьну, рягьматдиз гъушниз. Дугъанра шубур йитимар кьюбрид бабари уьрхюрача. Узу веледар, гъахидар, дархидар ву кIури, зат жара гъапIур дарза. Гъи ихь вари эскрар йиз веледарси гьисаб апIураза. Дурариз ахъюшин кайивали йиз жандиз гизаф тясир апIура», – кIура Шекер Гюлмягьямедовайи.