Февралин вазлин аьхиримжи 28-пи йигъан Дагъустан Республикайин Халкьдин Собраниейин нубатнан сессия кIули гъубшну.
Сессия чан хушниинди Урусатди кIули гъабхурайи хусуси метлеб айи дявдин операцияйиз гъушу ва гьамусяаьт отпускдиз дуфнайи РД-йин Халкьдин Собраниейин депутат Расим Гьяжиагъаев удучIвну улхбалан ккебгънийи.
«Хусуси метлеб айи дявдин операция ккебгъну, магьа сад йис гъабхьну. Дявдин гьяракатар ккергъу сабпи йигъланмина дагъустанлуйири ихь уьлкейин маракьар, гьам женгариъси, далу терефнаъра игитариси уьрхюра. Сикин дарди учуз гъюрайи кюмекназ лигну, женгарин улихь хьайи вари эскрарин терефнаан РД-йин Глава Сергей Меликовдиз ва йиз ляхнин юлдшариз чухсагъул мялум апIураза», – къайд гъапIнийи депутатди.
СВО-йин иштиракчи Расим Гьяжиагъаев удучIвну улхбан кьяляхъ, Дагъустандин Глава Сергей Меликовди думу Амет–Хан Султандин медаль тувбиинди лишанлу гъапIнийи. Му медаль, жигьилариз ва аргъаж шулайи наслиз ватанпервервалин тербия тувбак лайи-кьлу пай кивбаз лигну, туврайиб ву.
