Февралин 28-пи йигъан Мягьячгъалайиъ РД-йин ургубпи дих апIбан Халкьдин Собраниейин 20-пи сессия кIули гъубшну. Депутатарин улихьна, гьял апIбан бадали, 29 месэла адагънайи.
Сессияйиъ РД-йин Правительствойин председатель Аьбдул-муслим Аьбдулмуслимов респуб-ликайин 2022-пи йисандин яшайишдинна экономикайин артмиш’валин натижйириз бахш дапIнайи доклад хьади удучIвну гъулхнийи. Дугъу чан улхуб хусуси метлеб айи дявдин операцияйикан вуйи гафарилан ккебгънийи. Депутатар, гъийиху эскрарин гьюрмат уьбхюри, саб дакьикьайиъ ккебехъну гъузнийи. Премьер-министри къайд гъаIганси, республикайиъ дявдин операцияйиъ иштирак шулайидарин хизанариз кюмек апIура. Думу метлебариз республикайи 830 миллионтIан артухъ пул жара гъапIну. Хъасин премьер-министри учв кIулиъ айи правительствойи йисандин арайиъ гъапIу ляхникан ктибтнийи. Дугъан улхбан жикъи мяна исихъ туврача.
2024-пи йисан аьхириз республикайиъ хъархъас тартиб апIру завод либхуз хъюбгъди. Багарихьди Мягьячгъалайин аэропортдиз жямяаьтлугъ транспорт деебтбанди ву.
Дагъустандиъ гьяракатниинди тамам дапIну ккуни инвестицйирин 5 проект уьмриз кечирмиш апIура. Дурарин арайиъ шюше, йимишар-мейвйир гьясил апIбан кластерар, ликариин алахьрудар дирхувал артмиш апIувал а. Правительствойи инвесторариз варибдин кюмек тувра.
Гъубшу йисан электроэнергия-йихъди тямин апIбан цирклиъра ужудар хъуркьувалар гъахьну. Кьибла Сухокумскдиъ 15 мегаватт кьувват айи электростанция тикмиш дапIна. Думу жюре станцйир Нугъай ва Дербент районариъра дивбанди ву. Агьалйир газдихъди тямин апIувалин ляхинра улихь гъябгъюра. 3 гъулаз газ гъизигну, 12 гъулазсана газ зигуз мумкинвалар духьна.
Догазификацияйин программайи ляхин апIура – гъийин йигъаз 523 хуларихъна газ гъизигну.
Дагъустандин гъулан зегьметкешарира ужудар хъуркьувалар гъазанмиш дапIна. Гъубшу йисан 260 агъзур тоннатIан артухъ тIумтIар уч гъапIну. Дюгю убзрудари 30 гектариъ дюгю гъубзну. Гъизилюрт райондиъ йиккун комбинат тикмиш апIура. Хасавюрт райондиъ йисандин арайиъ 20 миллион мурта хру пеэрин фабрикайин проект уьмриз кечирмиш апIура.
Яркьуди РД-йин правительствойи дапIнайи ляхникан газатдин сайтдиъ урхуз шулу.
