Улихьна йигъари Хив райондин культурайинна эрг’вал йивбан Центриъ гъябгъюрайи йисан мектеб ккудубкIурайи баяр-шубарин абйир-бабарихъди гюрюш кIули гъубшну.

 

Серенжем, имтигьнар заан дережайиъди кIули гъахбан бадали, Хив РОО-йин жягьтлувалиинди тешкил гъапIуб вуйи.

Улихьна йисари Сабвуйи имтигьнар туврайи вахтна йишвариин арайиз гъафи жюрбежюр гъалатIарикан улхури, райондин глава Ярмет Ярметовди абйир-бабарикан му жигьатнаан баяр-шубариз чпин аьгъювалар ва удукьувалар дибдиан ахтармиш апIбаз манигъ’вал дарапIувал ккун гъапIну.

– ЕГЭ кьувватнаъ ипу йисари, жиниб дар, имтигьнар тувбаъ гъирагъдилан вуйи вакиларин иштирак’валиинди хайлин камиваларра арайиз гъафну. Мушваъ гьарури чан хусуси маракьар уьрхюри гъахьну. Гъи дициб мумкинвал имдар. ГИА тувбан къайдйир гьичра ижми духьна. Мушваъ абйир-бабарин иштирак’вал лазим дар. Выпускникдихьди чан удукьувалар улупуз гъитай, – гъапну дугъу.

Хив райондиъ ЕГЭ ва ОГЭ тувбан гьякьнаан жавабдарвал гъабхурайи Физули Аьбдулязизовди гъапиганси, выпускникари имтигьнар тувбан метлебниинди Хиварин кьялан мектебдин бинайиин лазим вуйи вари шартIар ади ППЭ ккабалгна. Имтигьнар тувбан кампания 24-пи майдилан ккебгъди. Гъябгъюрайи йисан Хив райондиъ 147 касди ЕГЭ ва 233 касди ОГЭ тувди.