8 Мартдин машкврин вахтна дишагьлийири терефназ хайлин мани гафар кIури шулу. Гизафси дурариз уьмриъ марцци ва текрар даршлу мюгьюббат хьувал, ккунивалин манишнахъди аргувал, бахт дадмиш апIувал ккун апIури шулу. Узуз гъи газат урхурайидариз сар машгьур дишагьлийин уьмриъ гъабхьи гьациб марцци мюгьюббатнакан ктибтуз ккундузуз.

 

Му дюшюш Париждиъ гъабхьиб вуйи. Вари дюн’яйиз машгьур артист Эдит Пиаф чан дустари Мароккойиан вуйи машгьур спортсмен Марсел Сердандихъди таниш гъапIнийи. Думу гюрюшдихъан сакьюдар йигъар улдучIвбан кьяляхъ, Марсели Эдитдиз телефондиан зенг апIуру ва гюрюшмиш хьуз теклиф дивру. Хъайигъан дурар кьюридра сар-сариин юкIв улубкьнайивалин гъавриъ шулу. Жандин ягъли ва тIарам гурдмар удучIвнайи спортсмендин гъвалахъ Эдит Пиаф бицIи ришси рякъюйи. Фицики дугъан ягълишин 147 сантиметртIан дайи. Йишвну дурар кми-кмиди Нью-Йорк шагьриъ лицуз гъягъюйи.

ИкибаштIан, боксдин Францияйиъ гъабхьи чемпионатдин гъалибчийин ва машгьур артисткайин арайиъ ачмиш гъабхьи мюгьюббатнакан варидариз хабар шулу. Журналистарихъди вуйи пресс-конференцияйиъ Эдитдин гьякьнаан суал тувган, Марсели чаз думу кIваантIан ккун духьнайиваликан гъапнийи.

1949-пи йисан 28-пи октяб-риъ Марселиз чан ккунирихьан «Уву рякъюз ул хъайиз» дибикIнайи телеграмма гъафнийи. Гьадмусяаьт дугъу самолетдиъди Нью-Йоркдиз тIирхуз билет гъадабгъуру. Думу айи самолет Азорский къураматариин тIубкIуру. ГвачIнинган Эдит чIуру хабрари хъергнийи. Гьадму йигъан хябяхъган машгьур «Версаль» залиъ дугъан аьхю концерт айи. Эдит Пиаф сягьнайиина хилариин илитну адагънийи. Дугъхьан лицуз шули имдайи. Чаз йивурайи гарччлар дерккну, дугъу концертдиз дуфнайи агъзрариинди тамашичйириз яваш сесниинди гъапну: «Гъи учву узуз гарччлар йивну ккундар. Гъи узу Марсел Сердандиз мяъли апIурза. Анжагъ сар гьадгъаз».