Мартдин 7-пи йигъан «Дагъустан» РИА-йин пресс-конференцйир гъахру залиъ РД-йин культурайин министр Зарема Бутаева республикайин СМИ-йин вакиларихъди гюрюшмиш гъахьнийи.
Культурайин министрин ва журналистарин арайиъ гъабхьи сюгьбатнаъ Зарема Бутаева гъубшу йисандин натижйирикан ва Расул Гьямзатовдин 100 йисандин юбилей къайд апIуваликан гъулхнийи.
Серенжемдин эвелиъ министри гъапиганси, 2022-пи йис Урусатдин халкьарин культурайин ирсназ бахш дапIнайи йис вуйивализ лигну, культурайин материалин дару ирс уьбхбан гьякьнаан важиблу къанун кьабул гъапIнийи. «Культура» милли проектдин дахилнаъди аьхиримжи йисари республикайиъ 50-риинакьан культурайин хулар рас дапIна.
Гъубшу йисан культурайин 12 хулар, искусствойин 2 мектеб, модельный 4 библиотека рас гъапIну. Гьаму йисан 5-сан гьацдар библиотекйир ачмиш апIбанди ву.
«Гьяйифки, пулин гизаф дакьатар хусуси метлеб айи дявдин операцияйиз жара апIурайивализ лигну, гьаму йисанра Табасаран милли театрин дараматар тикмиш апIувал планламиш апIуз шуладар. Къайд апIуз ккундузузки, Федеральный бюджетдиан 5 муниципалитетдин модельный библиотекйириз пул жара дапIна. Гьадму хьуб библиотекайин арайиъ Табасаран райондин кьялан библиотекара а. Райондин библиотека деврин тIалабариз гъилигу тяминатарихъди, компьютерарихъди, цIийи авадлугъарихъди ва китабарихъди тямин апIиди. Душваъ яратмиш апIбарин устахана, китабар урхрудариз ва компьютерихъ лихрудариз залар ачмиш апIбанди ву», – гъапнийи йиз суалназ жаваб вуди Зарема Бутаевайи. Ихь театриз дарамат тикмиш апIувал хъана ярхла вахтназ гъибтну.
Зарема Бутаевайи къайд гъапIганси, 1-пи мартдиъ Мягьячгъалайиъ айи М.Горькийин ччвурнахъ хъайи Урус театриъ Расул Гьямзатовдин йис къайд апIувалин серенжемар башламиш гъапIнийи. Думу серенжемдиъ республикайин кIулиъ айи Сергей Меликов иштирак гъахьнийи.
«Гьамусяат ихь улихь жюрбежюр конкурсар, яратмишарин фестивалар, мектебариъ урхурайидарихъди ачухъ дарсар, шиърар урхувалар ва жара серенжемар тешкил апIувал дийиб-гъна. Июндин вазлиъ Федерацияйин Советдиъ гъягъру Расул Гьямзатовдин йигъар гъахувализ ккилигури ахьа», – гъапну Зарема Бутаевайи.
Урусатдин Президент Владимир Путинди вари уьлкейин дережайиъди Расул Гьямзатовдин юбилей къайд апIувалин гьякьнаан указ адабгъувал – гьюрмат улупбан асас лишан ву. Владимир Владимирович Расул Гьямзатовдихъди танишди вуйи», – аьлава гъапIнийи министри.
Зарема Бутаевайи къайд гъапIганси, халкьдин шаирин бажаранвализ гьюрмат улупури, республикайин театрарин идарйири Расул Гьямзатовдин эсерариан спектаклйир дивди, республикайин милли библиотекайи Расул Гьямзатовдин яратмишариз бахш дапIнайи вари Урусатдин конференция гъабхиди.
