Мартдин 7-пи йигъан Мягьячгъалайиъ Дуствалин хулариъ респуб-ликайин кIулиъ айи Сергей Меликовдин регьберваликкди Дагъустандин дишагьлийириз – мялимариз, духтрариз, дявдин гъуллугънаъ айидарин дадйириз, гизаф бицIидар хъайи бабариз, искусствойин гъуллугъчйириз – гьюкуматдин наградйир тувбан серенжем кIули гъубшну.
Серенжем ачмиш апIури, Сергей Меликовди Дагъустандин дишагьлийир улубкьурайи 8-пи мартдин машкврихъди тебрик гъапIнийи ва республикайиъ жямяаьтлугъдин жюрбежюр цирклариъ хъуркьувалар гъадагънайи хайлин дишагьлийир айиваликан гъапнийи. Дугъан гафариинди, ляхниъ ашра, чпин хизандиз хъайивал апIури, дурар, важиблу пишекрарси, ужудар дадйир, хупар, гъарашугъар, гьякьлу дустар вуди шулу.
Мидланра савайи, республикайин Главайи СВО-йиъ иштирак шулайи дявдин гъуллугъчйирин ва чпин хушниинди ватандин маракьар уьрхюрайидарин дадйириз чухсагъул мялум гъапIнийи.
«Учву Ватандиз лайикьлу баяр ва шубар тербияламиш гъапIунчва. Дурари ихь уьлкейин тарихнан ирс баркаллуди уьбхиди, Ватандин девлет артухъ, уьмуми мюгькам гележег тикмиш апIиди», – къайд гъапIну респуб-ликайин Главайи.
Гьюкуматдин наградйир туву дишагьлийирин арайиъ Табасаран райондиан вуйи Кисран Асланова ва Сусанханум Хайруллаева айи. 14 велед – 6 бай ва 8 риш тербияламиш гъапIу Кисран Аслановайиз Дадавалин орден тувну. Гьяйифки, дугъан 3 бай гъийихну, имбудар, чпин хизанар ккергъну, Урусатдин жюрбежюр регионариъ яшамиш шула. Кисран бабу чан 40 худул ва 5 гудул варитIан аьхю девлетси гьисаб апIура.
Жигьилариз ватанпервервалин тербия тувбак лайикьлу пай кивбаз дилигну, Сусанханум Хайруллаевайиз Амет-Хан Султандин ччвурнахъ хъайи медаль тувну. Сергей Меликовди думу медаль тувруган, уч духьнайидарихьинди илтIикIну, Сусанханум Хайруллаевайин 4 бай хусуси метлеб айи дявдин операция гъабхурайи йишваъ айиваликан ва сар бай Кьягьялвалин орден тувуз улупнайиваликан гъапнийи.
Сергей Меликовдин гафариинди, думу дишагьлийи дирбаш, кьягьял эскрар тербияламиш гъапIну.
Гизаф веледар тербияламиш гъапIу дадйирихьинди илтIикIну, Республикайин Главайи чан умудар ачухъ гъапIну.
«Дюн’яйиъ варитIан аьхю ва кьувват айи дадайин ккунивали ухьу уьрхюра, ужуб бахтлу хизан ккебгъуз кюмек тувра. Гьелбетда, жараси хьуз мумкинра дар. Гьацдар хизанариъ бицIи вахтнахъанмина зегьметназ гьюрмат апIуз, гьякьлувалин шибритI ккивуз, Ватандиз вафалу хьуз, думу уьбхюз улупуру. Дицисдар хизанар ихь республикайинси, вари уьлкейин хъуркьувал ва девлет ву», – гъапну Сергей Меликовди.
