Мартдин 18-пи йигъан сяаьт йицIубдиъ Хив райондин культурайин дараматдин гьяятдиъ хьадукран аьдати машквар «Эбелцан» къайд апIиди.
Му серенжемдихьна район бина-йиан гьязур шула. Магьа гьаму йигъари Хив райондин администрацияйиъ, райондин глава Ярмет Ярметов кIулиъ ади, «Эбелцан» машкврин тешкиллувалин ляхнариз бахш дапIнайи яркьу совещаниера кIули гъубхнийи.
Совещание ачмиш апIури, Ярмет Ярметовди «Эбелцан» машкврин серенжемариъ хатIасузвал тяйин апIувал табшурмиш гъапIнийи.
«Хьадукран машквар къайд апIувалин мяна – хьадукрахъди аьлакьалу вуйи ихь кюгьне аьдатарихьна гьюрмат улупувал, ихь абйир-бабари хьадукран вахтна гъахури гъахьи ляхнар, машкврар ва аьдатар кIваин алаувал, жигьилар спортдин жюрбежюр талитариъ иштирак хьуз жалб апIувал ву», – гъапнийи Хив райондин главайи.
Машкврин серенжемарин тешкиллувалин комитетдин кIулиъ айи Мирзабег Багъичевди мялум гъапIганси, Эбелцнан гьязурвалин ляхнар вари аьхирихъна дуфна.
«Эбелцнан машквриъ кIули гъахуз планламиш дапIнайи вари серенжемар, хъа асас вуди спортдин талитар, улупнайи графикдиинди гъахиди. Эгер гьавйир чIур гъахьиш, талитар спортдин дараматдиъ тешкил апIидихьа», –къайд гъапIнийи дугъу.
Хив райондин культурайин, спортдин, жигьиларин политикайин ва туризмдин отделин начальник Казбек Къазиевди чан нубатнаъ «хьадукар-риш» ва машкврин цIа кабхьру гъулан агъсакъал кадагънайиваликан, гьацира табасаран, лезги ва агъул халкьарин машгьур артистарин иштирак’валиинди кIули гъябгъру концертдин программайикан ва аьдати сягьнйирикан мялуматар тувнийи.
Мидланра гъайри, машквар йигъан, Хив райондиз багахь районариан вуйи гъулан мяишатдин гьясилдрарин иштирак’валра ади, ярмаркара тешкил апIбанди ву.
ИкибаштIан, аьдат вуйиганси, райондиз му машквриз хайлин хяларра гъиди. Дурарин арайиъ багахь районарин главйир, Халкьдин Собраниейиъ айи ихь депутатар, РД-йин Главайин ва администрацияйин вакилар, алверчи касар, бизнесменар хьиди.
Сабсана къайд дарапIди гъитуз шулдар, спортдин талитар 6 жюрейиан гъахиди: шалмник кеъбаан, 32 кило гъагъ айи гиря за апIувалиан, 6-8 кило гъагъ айи гъван ярхлаз гатIабхьбаан, тIил зигбаан (командайиъ 5 кас духьну ккунду), армспортдиан (анжагъ жилартIан иштирак шулдар) ва гьяйвнариинди жаргъбаан.
Спортдин талитариъ гъулан администрацияйин главайихьна аьрза тувнайидарихьантIан иштирак хьуз шулдар.
Шалмник варитIан ухди кеуриз, гьяйвниинди сарпирди гъафириз ва тIил зигбаан сабпи йишвар гъадагъдариз пешкеш вуди якъар тувру, кьюбпи йишвариз – 3 агъзур, хъа шубубпи йишварин сагьибариз – кью-кьюд агъзур манат тувди. Армспортдиан, гиря за апIбаан ва гъван гатIабхьбаан варитIан заан натижа улупуриз 3 агъзур, кьюбпи йишваз – 2500, шубубпи йишв гъадабгъдариз – 2 агъзур манат улупна.
«Эбелцан» машквар Хив райондиъ фици кIули гъубшнуш, вари мялуматарихъди «Табасарандин нурар» газатдин сайтдиъ ва телеграмм каналиъ таниш хьуз шулучвхьан.
