22-пи мартдиъ, террориствалин идеологияйиз аьксивал улупбан сатIи вуйи программа уьмриз кечирмиш апIури, РД-йин мялуматарин ва чап апIбарин Агентствойи РД-йин «Координационный мялуматаринна культурайин центр» ГБУ-йихъди сатIиди «Мялуматариинди террориствализ аьксивал улупуб» кIул тувнайи республикайин семинар кIули гъубхнийи.
Серенжемдиъ удучIвну чан улхбаъ РД-йин МВД-йин ЦПЭ-йин экстремизмдиз мялуматариинди аьксивал улупбан отделин оперуполномоченный Сабина Сункулиевайи экстремизмдиз аьксивал улупбан центрин ва мялуматарин дакьатарин сатIи вуйи ляхнин тажрубайикан ктибтнийи.
«ЙицIуд йис улихьна, интернет-тахсиркарвалар ихь уьмриз гъюр кIури, фикиркьан кIулиз гъюрдайи, амма йислан-йисаз думу жюрейин тахсиркарвалар артухъ шула.
Мисал вуди 2022-пи йис гъадабгъиш, РД-йиъ айи МВД-йин гъуллугъчйири интернетдин сетдиъ 1445 тахсиркарвал ашкар гъапIну. Думу кьадарнакан 34 тахсиркарвал террориствалин актнакан кучIлин мялуматар тувбахъди аьлакьалу ву. Гъубшу йисан «дараматарикк минйир ккивна» кIуру жюрейин кучIлин мялуматари вари ихь уьлке гъаллаш гъапIнийи. Экстремиствалин ляхнихъна дих апIувалин 9 тахсиркарвал гьисабназ гъадагъна. Бегьем дару мобилизация-йихъди аьлакьалу вуди швнур-сар студентди Мягьячгъалайиъ тешкил гъапIу митинг варидарин кIваин илмишул. Инсандихьна вуйи даккнишин, душманвал улупбан 13 тахсиркарвал, РФ-дин Яракьлу Кьувватарин адлувал нукьсан апIбиина диш дапIнайи 18 тахсиркарвал ашкар дапIна», – гъапнийи дугъу.
Сабина Сункулиевайи гьацира уьлкейиъ бегьем дару мобилизация мялум дапIнайи вахтна республикайиъ гъахьи къайдасузвалариканра ктибтнийи. Студентар чпиз туву цIиб пулихъ ихтиярсуз митингариз удучIвури гъахьну. Натижайиъ дурари гъапIу тахсиркарваларин жавабдарвал абйир-бабарин гъюнариин алабхъну.
«Ихь республикайиз гъагъи 1999-пи йисар кьяляхъ дяргъбан бадали, ухьу апIурайи ляхниъ сатIи хьувал лазим ву, ихь инсанариз гьадму къурхулу йисарин натижйирикан гьархуз гъитну ккундар. Агьалйири интернетдин сетдиъ фагьумсуз гьяракатар дарапIбан бадали, дурарихъди вахтниинди ляхин дубхну ккунду», – къайд гъапIну Сабина Сункулиевайи.
