Улихьна йигъари, ММА жюрейин спортдин кчIихбариан Урусатдин чемпионатдиъ иштирак шлу дирбаш спортсменар гъядягъбан бадали, спортдин му жюрейиан Москва шагьрин талитар кIули гъушнийи.
Думу талитариъ Хив райондин спортдин мектебдиъ ММА-йин кчIихбариан устадвал гъадабгъурайи Хункар Аьгьмедов, Рягьимхан Рамазанов, Гюляли Нурялиев ва Арсен Мурадханов иштирак гъахьну. Думу спортсменари чпи иштирак гъахьи вари категорйириъ пешкешнан йишвар гъазанмиш гъапIну. Талитариъ 1-пи, 2-пи ва 3-пи йишвар гъадагъу спортсменар кубокариинди, дипломариинди ва медалариинди лишанлу гъапIнийи.
Москвайиъ гъадагъу заан натижйириз лигну, апрелин 26-29-пи йигъари Сочи шагьриъ ММА-йиан кIули гъябгъру вари Урусатдин чемпионатдиз Хив райондиан Хункар Аьгьмедов, Рягьимхан Рамазанов ва Руслан Рамазанов гъягъиди. Спортсменар гьамусяаьт талитарихьна гьязур шула. Дурариз хъуркьувалар ккун апIурхьа. Ва, икибаштIан, чемпионатдин натижйирикан учвуз мялуматар тувдича.
